Gjatë fjalës së mbajtur në foltoren e organizuar nga Partia Demokratike përpara Kryeministrisë në Tiranë, kryetari i saj, Sali Berisha, formuloi akuza të forta ndaj qeverisë dhe kryeministrit, duke kërkuar mobilizim të vazhdueshëm qytetar deri në ndryshimin e situatës politike në vend.
Në deklaratën e tij, Berisha theksoi se lëvizja e opozitës nuk duhet parë si një përballje e zakonshme politike, por si një proces që, sipas tij, nuk mund të ndalet deri në arritjen e objektivave të saj. Ai e përshkroi këtë angazhim si një betejë që synon fitore dhe ndryshim të thellë politik.
Duke u ndalur te sistemi i drejtësisë, ai foli për pritshmëritë që qytetarët kishin pasur ndaj SPAK, duke theksuar se një pjesë e madhe e publikut kishte besuar se ky institucion do luftonte korrupsionin dhe abuzimet me pushtetin. Megjithatë, Berisha vuri në pikëpyetje funksionimin e tij, duke përdorur tone kritike edhe ndaj ish-zëvendëskryeministres Belinda Balluku.
“Qytetarët shqiptarë, me të drejtë apo gabimisht, besuan te SPAK-u i partisë. Sipas sondazheve, 70% besonin te ky institucion. Ata besonin se do shpëtonin nga vjedhja dhe korrupsioni dhe se ky institucion do mbronte interesat e tyre. “Sot, kur dhëmbët e këtij institucioni mbeten në vithet e Lubi Ballukut, çfarë do thoni? Çfarë shprese keni ju më? A është ky fundi i shpresës? Jo kurrë!” tha ai.
Sipas tij, shpresa për ndryshim mbetet te qytetarët dhe bashkimi i tyre për të sjellë, siç u shpreh ai, rikthimin e drejtësisë, ligjit dhe Kushtetutës. Ai deklaroi se, në këndvështrimin e tij, vendi nuk ka perspektivë me kryeministrin aktual dhe bëri thirrje për angazhim të fortë qytetar për ndryshim politik.
Berisha theksoi gjithashtu se mbështetja ndërkombëtare për reformën në drejtësi ka qenë e konsiderueshme, por pretendoi se sistemi është vënë nën ndikim politik. Në këtë kuadër, ai u bëri thirrje qytetarëve të marrin përgjegjësi për të ardhmen e vendit, duke e konsideruar protestën si mjetin kryesor për të arritur ndryshime.
Në vijim, ai akuzoi kryeministrin për përdorim force ndaj protestuesve, duke paralajmëruar se, sipas tij, pasojat politike do të jenë të pashmangshme. Në përfundim të fjalës, Berisha deklaroi se kjo lëvizje synon një transformim të madh politik, duke e krahasuar me periudhën e fillimit të viteve ’90 dhe rrugën drejt demokracisë.
Në të njëjtën dalje publike, Berisha denoncoi edhe një episod që, sipas tij, lidhet me kryetarin e Kuvendit, Niko Peleshi, gjatë një vizite zyrtare në Gjermani. Ai shpjegoi se ishte planifikuar një takim me homologun gjerman, ku, sipas praktikave parlamentare, delegacioni duhej të përfshinte edhe përfaqësues të opozitës dhe partive të tjera.
Sipas Berishës, situata ndryshoi pasi ai u kishte kërkuar deputetëve të Partisë Demokratike që gjatë takimit të paraqisnin para autoriteteve gjermane mënyrën se si, sipas tij, drejtohet Parlamenti në Shqipëri. Ai pretendoi se kjo kërkesë ndikoi që udhëtimi të zhvillohej pa pjesëmarrjen e deputetëve të PD-së.
Kreu i Partisë Demokratike e cilësoi këtë si një përpjekje për të shmangur kritikat e opozitës në një forum ndërkombëtar dhe akuzoi drejtuesit e Kuvendit për mungesë transparence, si dhe përjashtim të opozitës nga përfaqësimi institucional.
