Ish-presidenti i burgosur i Brazilit, Jair Bolsonaro, u shtrua në reanimacion të premten pasi u diagnostikua me bronkopneumoni, sipas një shënimi mjekësor nga spitali “DF Star”.
Bolsonaro, 70 vjeç, u dërgua në spital herët të premten me ethe të larta, dridhje dhe rënie të oksigjenit, duke shtuar se ai po trajtohet me antibiotikë.
Gjendja e ish-presidentit është e rëndë dhe ai pritet të qëndrojë në spital të paktën për disa ditët e ardhshme, u tha gazetarëve në Brazilia një nga mjekët që po e trajton atë, Brasil Caiado.
Ish-presidenti brazilian Jair Bolsonaro largohet nga spitali ku shkoi për t’iu nënshtruar një procedure kirurgjikale të lëkurës, e autorizuar nga gjyqtari i Gjykatës Supreme, Alexandre de Moraes, duke lënë arrestin e shtëpisë pasi u dënua nga shumica e Gjykatës Supreme për konspiracion për grusht shteti me qëllim që të mbetej në pushtet pas humbjes së zgjedhjeve të vitit 2022…
Ndërhyrja kirurgjikale është përjashtuar për momentin, tha Caiado.
Ish-presidenti, i cili qeverisi nga viti 2019 deri në vitin 2022, ka një histori shtrimesh në spital dhe operacionesh të lidhura me një sulm me thikë gjatë një aktiviteti fushate në vitin 2018, shkruan Reuters.
Ai ishte shtruar në janar për një seri ekzaminimesh pasi u rrëzua dhe goditi kokën. Në dhjetor, ai iu nënshtrua procedurave mjekësore për të trajtuar një hernie dhe lemzë të vazhdueshme.
Bolsonaro po vuan një dënim prej 27 vitesh burg për komplot për grusht shteti pas humbjes së zgjedhjeve presidenciale të vitit 2022 përballë presidentit aktual, Luiz Inacio Lula da Silva.
