Zëvendëspresidenti amerikan JD Vance deklaroi se, edhe nëse presidenti Donald Trump vendos të ndërmarrë sulme ndaj Iranit, nuk ka “absolutisht asnjë shans” që Shtetet e Bashkuara të përfshihen në një luftë të zgjatur që mund të zgjasë me vite, përcjell YNet.
Në një intervistë për The Washington Post, Vance tha se nuk është në dijeni të vendimit përfundimtar që mund të marrë Trump lidhur me Iranin, por përmendi se opsionet mbi tryezë përfshijnë si goditje ushtarake për të siguruar që Irani të mos sigurojë armë bërthamore, ashtu edhe zgjidhje përmes mjeteve diplomatike.
Sipas tij, çdo veprim i mundshëm do të kishte si objektiv parandalimin e zhvillimit të kapaciteteve bërthamore nga Teherani, por pa e futur SHBA-në në një konflikt afatgjatë në Lindjen e Mesme.
Deklaratat e Vance vijnë në një moment tensionesh të larta mes Uashingtonit dhe Teheranit, ndërsa administrata amerikane po shqyrton rrugët për të frenuar programin bërthamor iranian, mes paralajmërimeve për pasoja serioze në rast të përshkallëzimit ushtarak.
