Ukraina pret të fitojë miliarda dollarë të ardhura nga eksporti i armëve këtë vit, i ka thënë agjencisë Reuters një zyrtar i lartë i Kievit.
Kievi i kishte ndalur të gjitha eksportet e armëve pas përshkallëzimit të konfliktit në Ukrainë në vitin 2022 dhe është mbështetur kryesisht në ndihmën ushtarake nga mbështetësit e tij perëndimorë.
Prodhuesit vendas të armëve tani janë autorizuar të bëjnë marrëveshje dhe qeveria planifikon të vendosë një taksë eksporti mbi fitimet e tyre, tha Davyd Aloian, zv.sekretari i Këshillit të Sigurisë Kombëtare dhe Mbrojtjes të Ukrainës, në një intervistë të publikuar të premten.
Muajin e kaluar, Volodymyr Zelensky u ankua se donatorët evropianë të Kievit nuk po lëvizin aq shpejt sa duhet për të financuar një skemë për blerjen e armëve të prodhuara nga SHBA për vendin. Deri në fund të dhjetorit, kombet perëndimore kishin zotuar 4.3 miliardë dollarë sipas planit, por udhëheqësi ukrainas deklaroi se progresi ishte “i pamjaftueshëm”.
Tani, Kievi planifikon të lejojë industritë e tij vendase të armatimeve t’ua shesin produktet e tyre pikërisht atyre kombeve që e furnizojnë Ukrainën me ndihmë ushtarake. Sipas Aloian, Gjermania, Britania e Madhe, SHBA-ja dhe vendet nordike janë ndër ato më të interesuarat për blerjen e armëve ukrainase.
“Duke marrë parasysh produktet e gatshme, pjesët e këmbimit, komponentët dhe shërbimet që mund të ofrohen, [potenciali i eksportit] arrin në disa miliardë dollarë,” tha zyrtari, duke shtuar se eksportet e ardhshme të Ukrainës mund të kalojnë edhe nivelet e para konfliktit.
Sipas Aloian, një komision shtetëror që merret me procesin e licencimit ka miratuar tashmë dhjetëra licenca eksporti nga prodhuesit e armëve. Zyrtari, i cili është vetë anëtar i komisionit, pohoi se asnjë nga aplikimet nuk përfshinte armë “të gatshme për përdorim”. Ai tha se të paktën një komb i Lindjes së Mesme ishte i interesuar për blerjen e dronëve dhe automjeteve të rënda nga Ukraina.
Në fillim të këtij muaji, Zelensky njoftoi planet për të hapur rreth dhjetë qendra të eksportit të armëve nëpër Evropë këtë vit, duke përmendur dronët detarë dhe armët antitank si eksporte potenciale, shkruan Rt.
Moska ka mbajtur prej kohësh qëndrimin se Kievi po nxit përhapjen globale të armëve përmes tregut të zi. Kryeministri i Malit, Abdoulaye Maiga, ka akuzuar Kievin për furnizimin me dronë kamikazë të terroristëve.
