Nëpërmjet një postimi në Facebook, Belind Këlliçi ka reaguar pas protestës së zhvilluar një ditë më parë para Kryeministrisë, ku u regjistruan përplasje mes qytetarëve dhe policisë. Ai njoftoi se është proceduar dhe marrë nën hetim nga Policia e Shtetit për organizimin e protestës dhe udhëheqjen e përplasjes me efektivët.
Këlliçi tregoi se këtë informacion e ka mësuar ndërsa ndodhej në Miçigan, gjatë një takimi me Robert Lulgjuraj në Qendrën Kulturore “Nënë Tereza”. Ai e cilëson veprimin e policisë si një “target politik” të “shërbëtorit të bandave”, Ilir Proda, dhe një mënyrë për të frikësuar opozitën edhe nga larg.
Në njoftimin e tij, Këlliçi shkruan:
“Ndërkohë që takoja mikun tim Robert Lulgjuraj në Qendrën Kulturore ‘Nënë Tereza’ në Miçigan, prokurorin shqiptaro-amerikan që garon për në Kongresin e SHBA nën rradhët e Partisë Republikane, mësoj se Policia e Shtetit në Tiranë, e drejtuar nga ushtari i krimit të organizuar Ilir Proda, më paska proceduar dhe marrë nën hetim për organizimin e protestës dhe udhëheqjen e përplasjes me efektivët e rendit!!!”
Ai shtoi se do të jetë “në vijën e parë” më 20 shkurt, duke ftuar qytetarët të dalin në shesh “jo për partitë politike, por për atdheun, për flamurin tonë kombëtar”.
Përveç thirrjes për pjesëmarrje, Këlliçi gjithashtu nënvizoi mbështetjen e tij për Robert Lulgjurajn në garën për Kongresin Amerikan:
“Gjej rastin të ftoj çdo shqiptar në shtetin e Miçiganit dhe kudo tjetër, të mbështesë me çdo mundësi Robert Lulgjurajn, në këtë shans historik, që një shqiptar të ulet në Kongresin Amerikan.”
Reagimi i Këlliçit vjen pas tensioneve të ditëve të fundit në Tiranë, ku protestat e opozitës janë shoqëruar me ndërhyrje të policisë dhe përplasje mes qytetarëve dhe efektivëve.
