Partia Liberale Demokratike (LDP) në Japoni pritet të rifitojë shumicën në Dhomën e Ulët të Parlamentit, sipas projeksioneve mediatike të publikuara të dielën, në atë që konsiderohet një fitore e madhe për kryeministren Sanae Takaichi, përcjell DW.
Sipas transmetuesit publik NHK, bazuar në sondazhet e daljes, LDP-ja e Takaichit pritet të sigurojë rreth 300 mandate, duke tejkaluar ndjeshëm pragun prej 233 vendesh të nevojshme për shumicë në parlamentin me 465 deputetë. Së bashku me partnerin e koalicionit, Partinë e Inovacionit të Japonisë (JIP), koalicioni qeverisës pritet të arrijë rreth 310 mandate, çka i jep një shumicë prej dy të tretash.
Zgjedhjet e parakohshme u shpallën në janar nga Takaichi, e cila shpërndau parlamentin në përpjekje për të forcuar mandatin e saj dhe atë të partisë, pas një periudhe të vështirë të shënuar nga skandale dhe presion nga një opozitë e re në formim.
Projeksionet konfirmojnë pritshmëritë e sondazheve parazgjedhore, sipas të cilave LDP-ja do të siguronte e vetme shumicën parlamentare. Një rezultat i tillë do t’i lejonte koalicionit qeverisës të anashkalojë Dhomën e Lartë, e cila aktualisht kontrollohet nga opozita, dhe do të shënonte rezultatin më të fortë të LDP-së që nga fitorja e ish-kryeministrit Shinzo Abe në vitin 2017.
Kjo fitore pritet të sjellë një zhvendosje të mëtejshme djathtas në politikën japoneze. LDP-ja, e cila kishte një shumicë të ngushtë pas zgjedhjeve të vitit 2024, ka hasur vështirësi në miratimin e legjislacionit. Vetë Takaichi kishte paralajmëruar se do të jepte dorëheqjen nëse partia nuk do të siguronte shumicën.
Sipas NHK-së, aleanca e re qendrore reformiste dhe partia e ekstremit të djathtë Sanseito nuk arritën të përbëjnë një kërcënim serioz për kryeministren. Aleanca qendrore pritet të humbasë mbi dy të tretat e mandateve, ndërsa Sanseito parashikohet të rrisë përfaqësimin nga dy mandate në mes pesë dhe 14.
Sanae Takaichi u bë kryeministrja e parë grua e Japonisë në tetor. Ajo është e njohur për qëndrimet e saj ultrakonservatore dhe linjën e ashpër ndaj Kinës, si dhe për angazhimin për rritjen e shpenzimeve ushtarake, forcimin e sigurisë dhe politikat më të rrepta të emigracionit. Ajo e ka përmendur shpesh ish-kryeministren britanike Margaret Thatcher si frymëzim dhe ka fituar mbështetje të gjerë, veçanërisht mes votuesve të rinj.
Zgjedhjet u zhvilluan në një kontekst të vështirë klimatik, pasi reshjet rekord të borës në shumë zona të vendit kanë shkaktuar bllokim rrugësh dhe dhjetëra viktima, duke rrezikuar edhe vonesa në numërimin e votave.
