Një ditë pas përfundimit të raundit të fundit të bisedimeve bërthamore mes Iranit dhe Shteteve të Bashkuara në Oman, tensionet janë rritur ndjeshëm, teksa zyrtarët iranianë kanë lëshuar paralajmërime të forta për një përballje të mundshme ushtarake.
Shefi i Shtabit të Përgjithshëm të Iranit, Abdolrahim Mousavi, deklaroi të shtunën, gjatë një aktiviteti me rastin e “Ditës së Forcave Ajrore Iraniane”, se çdo sulm ndaj Iranit do të kishte pasoja të rënda, sipas Ynet.
“Çdo veprim ushtarak kundër Iranit do t’u kushtojë armiqve një çmim të rëndë dhe të pakthyeshëm. Ata e dinë shumë mirë se çdo agresion do të përfundojë me humbjen e tyre strategjike dhe me zgjerimin e luftës në rajon”, u shpreh Mousavi. Ai shtoi se “forcat tona janë në nivelin më të lartë të gatishmërisë, plotësisht të koordinuara dhe të përgatitura për t’u përgjigjur”.
Ndërkohë, sipas burimeve të cituara nga CNN, emisarët amerikanë Steve Witkoff dhe Jared Kushner vizituan aeroplanmbajtësen amerikane USS Abraham Lincoln një mëngjes pas përfundimit të bisedimeve, në kuadër të rritjes së pranisë ushtarake amerikane në rajon.
Kjo prani përfshin edhe atë që është përshkruar si një “armadë e madhe” me tetë shkatërrues detarë.
Ministri i Jashtëm iranian, Abbas Araghchi, foli për mundësinë e një sulmi amerikan në një intervistë për Al Jazeera, duke paralajmëruar se pasojat do të ishin të ngjashme me ato të luftës 12-ditore të fundit.
“Ne nuk do të jemi në gjendje të godasim territorin e SHBA-së. Nuk do të sulmojmë vendet fqinje, por do të godasim bazat amerikane të vendosura në to. Ka një ndryshim të madh mes këtyre dy gjërave”, tha ai.
Lidhur me bisedimet e zhvilluara të premten në Muskat, Araghchi sqaroi se ende nuk ka një datë të caktuar për raundin e dytë.
“Nuk ka ende një datë të saktë për raundin tjetër, por ne besojmë se ato duhet të zhvillohen së shpejti”, u shpreh ai, duke shtuar se takimi mund të mbahet në një vend tjetër.
Ai theksoi se “çështja bërthamore e Iranit mund të zgjidhet vetëm përmes negociatave”, duke shtuar se Teherani është i gatshëm për një marrëveshje që garanton transparencë dhe kufizime në pasurimin e uraniumit përmes ngadalësimit të ritmit të tij.
Megjithatë, ai nënvizoi se Irani refuzon transferimin e uraniumit jashtë vendit dhe se “çështja e raketave nuk është objekt negociatash, pasi lidhet drejtpërdrejt me sigurinë kombëtare”.
Araghchi përsëriti gjithashtu se Irani nuk kërkon përshkallëzim rajonal.
“Ne nuk duam luftë rajonale, ashtu siç nuk e duan as vendet e rajonit, por çdo sulm amerikan do ta ndryshojë këtë realitet”, tha ai, duke e cilësuar raundin e fundit të bisedimeve si “një fillim të mirë”, por duke pranuar se “rruga drejt ndërtimit të besimit është ende e gjatë”.
Në të njëjtën kohë, mijëra persona dolën në rrugë në Berlin dhe qytete të tjera europiane në mbështetje të protestave në Iran, në prag të 47-vjetorit të Revolucionit Islamik të vitit 1979. Policia gjermane vlerësoi se rreth 8 mijë protestues u mblodhën pranë Portës së Brandenburgut, ndërsa organizatorët thanë se ishin regjistruar 20 mijë pjesëmarrës. Demonstrata të ngjashme u mbajtën edhe në Londër, Malmö, Bukuresht dhe Sydney.
Presidentja e Këshillit Kombëtar të Rezistencës së Iranit (NCRI), Maryam Rajavi, deklaroi para turmës në Berlin se “mesazhi i popullit iranian mbetet i njëjtë: as qetësim, as luftë, as ndërhyrje e huaj, por ndryshim regjimi dhe një republikë e popullit, nga populli dhe përmes rezistencës së organizuar”.
Një protestuese, Samin Sabet, tha se “nuk duam një tjetër diktaturë dhe nuk duam monarki”, ndërsa Iraj Abedini, një psikolog nga Suedia, u shpreh skeptik për negociatat, duke thënë se “bisedimet mes Iranit dhe SHBA-së nuk do të çojnë askund”.
Nga ana e tij, Presidenti i SHBA-së, Donald Trump, deklaroi për herë të parë se “duket se iranianët e duan shumë një marrëveshje”, duke theksuar se Teherani nuk do të pajiset me armë bërthamore dhe se “ka ende shumë rrugë për të bërë drejt një marrëveshjeje”.
Ndërkohë, Thesari amerikan njoftoi sanksione ndaj 15 entiteteve iraniane dhe 14 anijeve të ashtuquajturës “flotë hije”, të përfshira në tregti të paligjshme nafte, vetëm disa orë pasi zyrtarët iranianë i përshkruan bisedimet si pozitive.
