Bombardimet me tanke dhe sulmet ajrore izraelite vranë të paktën 23 palestinezë në Rripin e Gazës të mërkurën, mes tyre shtatë fëmijë, njoftuan autoritetet shëndetësore palestineze. Dhuna e fundit përbën një tjetër goditje ndaj përpjekjeve për të ruajtur armëpushimin në enklavë.
Mes viktimave ishte edhe një mjek, i cili ishte nxituar për t’u ardhur në ndihmë të plagosurve pas një sulmi fillestar në qytetin jugor të Khan Younis. Ai u vra më pas nga një sulm i dytë izraelit në të njëjtën zonë, thanë zyrtarët e shëndetësisë.
Sulme të tjera goditën edhe Qytetin e Gazës në veri, ku autoritetet shëndetësore raportuan se u vra një foshnjë pesë muajshe. Këto zhvillime ndodhin vetëm tre ditë pasi Izraeli rihapi pikën kryesore kufitare të Gazës me Egjiptin, një hap kyç në kuadër të armëpushimit të mbështetur nga Shtetet e Bashkuara.
“Ndërsa po flinim në shtëpinë tonë, tanku na bombardoi dhe predhat goditën shtëpinë. Fëmijët tanë u martirizuan — djali im u martirizua, djali dhe vajza e vëllait tim u martirizuan. Ne nuk kemi lidhje me asgjë, jemi njerëz paqësorë,” tha Abu Mohamed Habouch gjatë ceremonisë mortore për familjarët e tij të vrarë.
Në Mawasi, një zonë bregdetare pranë Khan Younis ku janë vendosur çadra për mijëra palestinezë të zhvendosur nga luftimet, sulmet shqyen tendat dhe shkaktuan panik mes civilëve. Gati e gjithë popullsia e Gazës, mbi 2 milionë banorë, është detyruar të largohet nga shtëpitë e saj që prej nisjes së konfliktit.
Ushtria izraelite deklaroi se sulmet u kryen si përgjigje ndaj militantëve që, sipas saj, hapën zjarr ndaj trupave izraelite që operonin pranë vijës së armëpushimit me Hamasin. Sipas ushtrisë, një ushtar izraelit u plagos rëndë nga zjarri i militantëve, një veprim që Izraeli e cilësoi si shkelje të marrëveshjes së armëpushimit.
Në një deklaratë të mëvonshme, ushtria izraelite njoftoi se një nga sulmet kishte në shënjestër një komandant të lartë të Hamasit. Ndërkohë, sipas familjarëve, një komandant i grupit militant Xhihadi Islamik dhe vajza e tij 11-vjeçare ishin mes viktimave të sulmeve të së mërkurës.
Hamasi reagoi duke thënë se veprimet izraelite po minojnë përpjekjet për stabilizimin e armëpushimit. Në një deklaratë zyrtare, grupi bëri thirrje për “presion të menjëhershëm ndërkombëtar për të ndalur shkeljet” dhe për të parandaluar përshkallëzimin e mëtejshëm të dhunës, shkruan Reuters.
