Gjyqtarja e GJKKO-së, Irena Gjoka, i ka dërguar një letër Këshillit të Lartë Gjyqësor lidhur me vendimin e Prokurorisë së Përgjithshme, sipas së cilës ajo ka qenë e dënuar në Greqi për falsifikim vize.
Gjoka, sipas organit të akuzës nuk e ka shënuar dënimin në formularin e dekriminalizimit në vitin 2016. Në letër ajo nënvizon se përplasja me autoritetet greke ka nisur në fund të vitit 2002, kur po udhëtonte drejt Greqisë me një vizë të marrë pranë konsullatës greke në Shqipëri, por hyrja iu refuzua nga policia kufitare.
Një vendim i ngjashëm u përsërit edhe më 13 shkurt 2003, ndalim që ajo e ka konsideruar të padrejtë. Sa i përket dënimit të dhënë nga drejtësia greke, që parashikonte tre muaj burg, një gjobë prej 1 500 eurosh dhe 73 euro shpenzime gjyqësore, me burgimin e konvertuar në pagesë financiare prej 4.4 euro për çdo ditë, Gjoka ka theksuar se vendimi nuk është zbatuar kurrë dhe se ajo nuk ka qenë në dijeni të zhvillimit të ndonjë procesi gjyqësor ndaj saj, shkruan BW.
“Personalisht nuk jam njoftuar, as zyrtarisht dhe as faktikisht, për ndonjë proces gjyqësor administrativ apo tjetër të zhvilluar ndaj meje në gjykatat greke”, ka deklaruar ajo, duke shtuar se vetëm pas publikimeve mediatike ka autorizuar përfaqësues ligjorë për të marrë informacion mbi vendimet që qarkullonin në emrin e saj. Gjoka ka pretenduar gjithashtu se dënimi nuk është regjistruar asnjëherë në regjistrin penal dhe, për këtë arsye, duhet të konsiderohet sikur nuk ka ekzistuar.
Sipas saj, vendimi i datës 7 qershor 2005 i Gjykatës së Shkallës së Parë për kundravajtje në Janinë nuk i është njoftuar kurrë dhe nuk ka marrë formë të prerë.
Ajo ka sqaruar se, bazuar në nenin 473 të Kodit të Procedurës Penale Greke, afati për apelimin nga persona me vendbanim të panjohur nis nga dita e njoftimit të vendimit, njoftim që, sipas saj, nuk ka ndodhur.
Pjesë nga letra e Gjokës
“Më datë 24 dhjetor 2002, unë Irena Gjoka jam paraqitur në pikën e kalimit kufitar Greqi, Kakavijë, ku policia kufitare më ka ndaluar hyrjen në shtetin grek (pas një debati që kam bërë me punonjësin e policisë së kufirit). Kam vlerësuar se autoritetet greke nuk kanë pasur asnjë arsye të ndalojnë hyrjen time në Greqi dhe për këtë arsye jam pajisur me një vize tjetër, pranë konsullatës greke në Shqipëri. Në vijim, më datë 13 shkurt 2003, jam paraqitur sërish në kufi, ku përsëri më është ndaluar hyrja, në mënyrë të padrejtë.
Meqenëse kam qenë e bindur në paligjshmërinë e masës administrative të ndërmarrë ndaj meje, refuzimin e hyrjes në shtetin grek, në kushtet kur nuk kisha të drejtë hyrje në këtë shtet, në datën 31.03.2003, kam autorizuar shtetasin Andon Konomi/Ikonomou (ky shtetas nuk ka pasur cilësinë e avokatit) për të kundërshtuar për llogari timen, masën administrative të marrë në mënyrë të paligjshme dhe arbitrare nga autoritetet greke, pranë Ministrisë së Rendit Publik Athinë apo çdo institucioni tjetër, për të kryer çdo lloj veprimi që nuk është i ndaluar me ligj, lidhur specifikisht me masën e ndalimit të hyrjes të dhënë ndaj meje.
Pavarësisht këtij fakti, personalisht nuk jam njoftuar, as zyrtarisht dhe as faktikisht për procesin gjyqësor administrativ apo ndonjë proces tjetër të zhvilluar ndaj meje, në gjykatat Greke. Pasi në media janë publikuar vendime administrative apo të natyrave të tjera në emrin tim, duke mos qenë në dijeni të asnjë vendimi, kam autorizuar përfaqësues me prokurë të posaçme për të marrë informacion, për çka publikohej.
Nga aktet që më janë dorëzuar nga përfaqësuesi im si dhe aktet e përcjella nga autoritetet greke me anë të letërporosisë, nëpërmjet Prokurorisë së Përgjithshme, jam informuar për herë të parë për vendimin e marrë nga Gjykata e Shkallës së Parë Janinë me nr.1447/2005, datë 07.06.2005, sipas së cilit rezultoj e dënuar në mungesë nga kjo gjykatë në datë 07.06.2005, pa praninë e një mbrojtësi, pa u njoftuar për procesin ndaj meje, si gjatë hetimit dhe gjykimit të çështjes, për veprën e parashikuar në paragrafin 7 të nenit 54 të ligjit 2910/2001 me titull “Hyrja dhe qëndrimi i të huajve në Territorin Grek”, me tre muaj burgim dhe 1500 Euro Gjobë. Dënimi me burgim është konvertuar me gjobë në masën 4,4 Euro në ditë.
Vendimi i datës 07.06.2005, i Gjykatës së shkallës së parë me tre anëtare për kundravajtje të Janinës nuk më është njoftuar asnjëherë dhe ky vendim nuk ka marrë formë të prerë. Sipas nenit 473 të Kodit të Procedurës Penale Greke afati për paraqitjen e apelit për të pandehurit me vendbanim të panjohur është 30 ditë nga dita e njoftimit të vendimit (vendimi i cili nuk është njoftuar asnjëherë). Përpara se të përfundonte afati i apelimit, më datë 17.06.2005 është miratuar ligji nr.3346/2005 “Përshpejtimi i procedurës para gjykatave civile dhe penale dhe dispozita të tjera”.
Sipas edhe interpretimit të kryer nga GJEDNJ , në çështjen Panou kundër Greqisë (nr. 44058/05, 8 janar 2009), vendimi i dënimit i arkivuar sipas këtij ligji konsiderohet i paqenë, me kusht që, për një periudhë 18-mujore nga publikimi i ligjit (17 qershor 2005), të mos kryhet një vepër tjetër vepër penale me dashje, për të cilën do të dënohej përfundimisht me burgim më të gjatë se gjashtë muaj. Sipas edhe interpretimit të GJEDNJ-së edhe pse humbiste e drejta për të ushtruar apelim, efektet e ligjit ishin baras me shfajësim. Ky ishte edhe qëllimi i ligjit, i cili synonte përshpejtimin e drejtësisë penale, ndër të tjera, përmes uljes së numrit të apelimeve për çështje të vogla. Kështu në zbatim të këtij ligji, prokurori ka vendosur arkivimin e vendimit të marrë ndaj meje më datë 07.06.2005.”
