Prodhuesit e barnave planifikojnë të rrisin çmimet në SHBA për të paktën 350 ilaçe të markuara, përfshirë vaksina kundër COVID-19, RSV dhe herpesit, si edhe trajtimin e njohur kundër kancerit Ibrance, pavarësisht presionit nga administrata e Donald Trump për ulje çmimesh, sipas të dhënave të ofruara ekskluzivisht nga firma kërkimore në shëndetësi 3 Axis Advisors.
Numri i rritjeve të çmimeve për vitin 2026 është më i lartë krahasuar me të njëjtën periudhë të vitit të kaluar, kur kompanitë farmaceutike kishin paralajmëruar rritje për më shumë se 250 barna. Rritja mesatare e çmimeve këtë vit është rreth 4 për qind, në linjë me vitin 2025.
Këto rritje nuk pasqyrojnë zbritjet që u jepen menaxherëve të përfitimeve farmaceutike apo skemat e tjera të diskontimit.
Ndërkohë, disa kompani planifikojnë edhe ulje çmimesh për një numër të kufizuar barnash.
Rreth nëntë ilaçe pritet të pësojnë ulje, përfshirë një ulje mbi 40 për qind për ilaçin kundër diabetit Jardiance të kompanisë Boehringer Ingelheim dhe tre trajtime të lidhura me të. Boehringer Ingelheim dhe Eli Lilly, që e tregtojnë bashkë Jardiance, nuk kanë dhënë menjëherë komente për arsyet e këtyre uljeve.
Jardiance është një nga 10 barnat për të cilat qeveria amerikane ka negociuar një çmim më të ulët për programin Medicare për personat mbi 65 vjeç, duke nisur nga viti 2026. Në kuadër të këtyre negociatave, Boehringer dhe Lilly e ulën çmimin e Jardiance me rreth dy të tretat.
Pacientët amerikanë aktualisht paguajnë shumë më tepër për barnat me recetë sesa qytetarët e vendeve të tjera të zhvilluara, shpesh gati trefishin e çmimeve.
Donald Trump ka ushtruar presion mbi kompanitë farmaceutike që t’i ulin çmimet në nivele të krahasueshme me ato që paguajnë pacientët në vende me nivel të ngjashëm zhvillimi ekonomik.
Rritjet e çmimeve për 350 barna po ndodhin edhe pse Trump ka arritur marrëveshje me 14 kompani farmaceutike për çmimet e disa ilaçeve në kuadër të programit Medicaid për amerikanët me të ardhura të ulëta dhe për blerjet direkte me para në dorë. Pfizer, Sanofi, Boehringer Ingelheim, Novartis dhe GSK janë mes këtyre kompanive dhe gjithashtu planifikojnë rritje çmimesh për disa barna që nga 1 janari.
“Këto marrëveshje po paraqiten si transformuese, kur në fakt ato vetëm sa prekin sipërfaqësisht problemin real që nxit çmimet e larta të barnave me recetë në SHBA,” tha Dr. Benjamin Rome, studiues i politikave shëndetësore në spitalin Brigham and Women’s në Boston.
Sipas tij, kompanitë duket se po maksimizojnë çmimet, ndërsa paralelisht negociojnë zbritje me siguruesit shëndetësorë dhe farmaceutikë, për të vendosur më pas një çmim tjetër për shitjet direkte tek konsumatori.
Një zëdhënës i Departamentit amerikan të Shëndetësisë (HHS) refuzoi të komentojë.
Në vitet e fundit, kompanitë farmaceutike kanë frenuar rritjet e forta të çmimeve, pas kritikave të ashpra nga ligjvënësit dhe politikave të reja qeveritare, përfshirë penalizimin e kompanive që rrisin çmimet për Medicare më shpejt se inflacioni.
Pfizer ka njoftuar numrin më të madh të rritjeve, për rreth 80 barna të ndryshme, përfshirë Ibrance, ilaçin kundër migrenës Nurtec, trajtimin kundër COVID-19 Paxlovid, si edhe disa barna që përdoren në spitale, si morfina dhe hidromorfoni.
Shumica e rritjeve të Pfizer janë nën 10 për qind, me përjashtim të një rritjeje prej 15 për qind për vaksinën kundër COVID-19 Comirnaty, ndërsa disa barna spitalore me çmim të ulët pësuan rritje mbi katërfish.
Në një deklaratë, Pfizer tha se kishte përshtatur çmimin mesatar të listës për barnat dhe vaksinat e saj inovative për vitin 2026 nën normën e përgjithshme të inflacionit.
“Kjo rritje modeste është e nevojshme për të mbështetur investimet që na lejojnë të vazhdojmë zbulimin dhe ofrimin e barnave të reja, si edhe për të përballuar rritjen e kostove në të gjithë aktivitetin tonë,” thuhet në deklaratë.
Kompania europiane GSK planifikon të rrisë çmimet për rreth 20 barna dhe vaksina, me rritje që variojnë nga 2 për qind deri në 8.9 për qind, duke theksuar se këto rritje janë të nevojshme për të mbështetur inovacionin shkencor. Sanofi dhe Novartis nuk iu përgjigjën kërkesave për koment.
Sipas Reuters, më shumë rritje dhe ulje çmimesh pritet të shpallen në fillim të janarit, i cili historikisht është muaji kryesor kur kompanitë farmaceutike rrisin çmimet e barnave në SHBA.
