Presidenti i Ukrainës, Volodymyr Zelenskyy, ka bërë të ditur se një takim me presidentin e SHBA-së, Donald Trump, pritet të zhvillohet “në një të ardhme të afërt”, si pjesë e përpjekjeve diplomatike për t’i dhënë fund luftës gati katërvjeçare me Rusinë, përcjell Euronews.
Në një postim në rrjetin social X, Zelenskyy shkroi se palët kanë rënë dakord për një takim në nivelin më të lartë dhe se “shumë gjëra mund të vendosen para Vitit të Ri”. Ai theksoi se Ukraina nuk po humbet asnjë ditë në këto përpjekje diplomatike.
Deklarata e Zelenskyyt vjen pas bisedimeve që ai zhvilloi një ditë më parë me të dërguarin special amerikan Steve Witkoff dhe Jared Kushner, dhëndrin e presidentit Trump, të cilat ai i cilësoi si “të mira”.
Ndërkohë, Uashingtoni ka intensifikuar përpjekjet diplomatike për t’i dhënë fund luftës, por negociatat po përballen me kërkesa të kundërta nga Moska dhe Kievi. Zelenskyy ka deklaruar se Ukraina do të shqyrtonte tërheqjen e trupave nga disa zona të lindjes së vendit si pjesë e një plani paqeje, vetëm nëse edhe Rusia tërhiqet dhe rajoni kthehet në zonë të çmilitarizuar nën mbikëqyrje ndërkombëtare.
Rusia, nga ana tjetër, nuk ka dhënë sinjale për një tërheqje të tillë dhe ka insistuar që Ukraina të heqë dorë nga territoret e Donbasit, kërkesë kjo e refuzuar nga Kievi. Të pazgjidhura mbeten edhe çështja e centralit bërthamor të Zaporizhzhyas, si dhe kërkesa e Kremlinit që Ukraina të mos anëtarësohet në NATO.
Në terren, luftimet kanë vijuar. Sulmet me dronë rusë në qytetin Mykolaiv lanë pa energji elektrike një pjesë të qytetit, ndërsa Ukraina njoftoi se ka goditur një rafineri të madhe nafte në rajonin rus të Rostovit, duke përdorur raketa Storm Shadow të furnizuara nga Mbretëria e Bashkuar.
Autoritetet ukrainase theksojnë se sulmet ndaj infrastrukturës energjetike ruse synojnë të dobësojnë aftësinë e Moskës për të financuar luftën, ndërsa Rusia, sipas Kievit, po përpiqet të dëmtojë sistemin energjetik ukrainas për të rënduar kushtet e jetesës së civilëve gjatë dimrit.
