Microsoft planifikon të investojë 10 miliardë dollarë në infrastrukturën e inteligjencës artificiale në një qendër të dhënash në qytetin portugez të Sines gjatë viteve të ardhshme, duke shënuar një nga projektet më të mëdha të investimeve në inteligjencën artificiale në Evropë, tha kompania të martën.
Gjiganti i teknologjisë do punojë në partneritet me zhvilluesit Start Campus, platformën e infrastrukturës së AI Nscale dhe prodhuesin e çipave NVIDIA për të vendosur 12,600 Njësi të Procesimit Grafik (GPU) të gjeneratës së ardhshme të NVIDIA-s në Sines, 150 km në jug të Lisbonës.
Start Campus, një sipërmarrje mes fondit amerikan të investimeve Davidson Kempner dhe Pioneer Point Partners të Britanisë, njoftoi në prill një plan për të investuar 8.5 miliardë euro deri në vitin 2030 në një qendër të dhënash për t’i shërbyer kërkesës në rritje nga kompanitë kryesore të teknologjisë dhe AI. Një nga gjashtë ndërtesat e planifikuara është tashmë në funksionim, shkruan Reuters.
“Duke forcuar infrastrukturën kombëtare të AI përmes bashkëpunimit me Nscale, NVIDIA dhe Start Campus, ne po ndihmojmë në pozicionimin e Portugalisë si pikë referimi për zhvillimin e përgjegjshëm dhe të shkallëzuar të AI në Evropë,” tha zëvendëskryetari dhe presidenti i Microsoft, Brad Smith.
Portugalia ka projekte të mëdha investimi të rreshtuara për Sines për të prodhuar energji të gjelbër për të fuqizuar qendrat e të dhënave që kërkojnë shumë energji. Vija bregdetare atlantike e Portugalisë e pozicionon atë si një qendër kryesore për kabllot nënujore që lidhin Evropën, Afrikën dhe Amerikën, duke formuar shtyllën kurrizore të Rrjetit Mbarëbotëror (World Wide Web).
Investimet në qendrat e të dhënave, të cilat ndihmojnë në sigurimin e fuqisë kompjuterike për AI, janë rritur që kur OpenAI lëshoi ChatGPT në vitin 2022, pasi kompanitë në të gjithë sektorët po zhvendosin gjithnjë e më shumë operacionet e tyre në cloud dhe po integrojnë AI në bizneset e tyre.
