Kreu i Partisë Demokratike, Sali Berisha, ka risjellë në vëmendje çështjen e regjistrimit të vitit 2011 që përfshinte ish-zv.kryeministrin Ilir Meta, duke akuzuar kryeministrin Edi Rama dhe gazetarin Filip Çakulli për manipulim të materialit që çoi në dorëheqjen e Metës.
Në një deklaratë publike, Berisha tha se Meta i kishte ardhur në zyrë dhe i kishte komunikuar vendimin për dorëheqje, duke i thënë: “Nuk mund të paraqitem para prokurorit si zv.kryeministër.”
Sipas Berishës, regjistrimi ku përmendej shifra prej 700 mijë eurosh ishte në fakt një dokument zyrtar i dërguar Metës nga një kompani, dhe jo provë e ndonjë afere korruptive. Ai shtoi se ekspertiza italiane kishte zbuluar 27 ndërhyrje të tipit “cut and paste” në regjistrim, duke e cilësuar atë si të manipuluar.
“Ata që mendojnë se ky është një popull pa memorie, gabohen. Ilir Meta dha dorëheqjen për një akuzë të montuar nga Rama dhe Çakulli” – tha Berisha, duke e cilësuar ngjarjen si një akt politik të qëllimshëm.
