Ministri i Jashtëm rus, Sergei Lavrov, tha të dielën se ishte gati të takonte Sekretarin e Shtetit të SHBA-së, Marco Rubio, por theksoi se Rusia nuk do t’i braktisë kushtet e saj thelbësore për t’i dhënë fund luftës në Ukrainë.
Përpjekjet e presidentit të SHBA-së, Donald Trump, për të ndërmjetësuar një fund të luftës në Ukrainë, luftës më vdekjeprurës në Evropë që nga Lufta e Dytë Botërore, kanë dështuar deri më tani dhe ai muajin e kaluar anuloi papritur një samit të planifikuar me presidentin Vladimir Putin në Budapest.
Kremlini të premten hodhi poshtë raportet e mediave perëndimore se Lavrov kishte prishur marrëdhënien me Putinin kur planet e samitit u prishën pasi ministria e Lavrov dërgoi një mesazh që tregonte se Moska nuk ishte e përgatitur të lëshonte pe mbi kërkesat e saj për Ukrainën.
“Sekretari i Shtetit Marco Rubio dhe unë e kuptojmë nevojën për komunikim të rregullt,” i tha Lavrov, ministër i jashtëm i Putinit që nga viti 2004, agjencisë shtetërore të lajmeve RIA Novosti.
“Është e rëndësishme për të diskutuar çështjen e Ukrainës dhe për të promovuar agjendën dypalëshe. Kjo është arsyeja pse ne komunikojmë me telefon dhe jemi gati të zhvillojmë takime ballë për ballë kur është e nevojshme,” tha Lavrov.
Gati katër vjet pasi Putin dërgoi mijëra trupa në Ukrainë, forcat ruse po avancojnë dhe kontrollojnë rreth 19% të Ukrainës, territor që Moska thotë se tani është ligjërisht pjesë e Rusisë, megjithëse Ukraia dhe fuqitë e Evropës Perëndimore thonë se nuk do e pranojnë kurrë zyrtarisht këtë.
Lavrov tha se “mirëkuptimet” e arritura nga Putin dhe Trump në samitin e tyre të 15 gushtit në një bazë ushtarake në Anchorage, Alaska, bazoheshin në kërkesat e Putinit të qershorit 2024.
Putin i parashtroi kushtet e tij thelbësore në qershor 2024, duke kërkuar që Kievi të heqë dorë nga planet e tij për t’u bashkuar me NATO-n dhe të tërheqë trupat nga e gjithë sipërfaqja e katër krahinave që Moska pretendon si pjesë të Rusisë: Donetsk dhe Luhansk në Ukrainën lindore – të cilat përbëjnë Donbasin – plus Kherson dhe Zaporizhzhia në jug, shkruan Reuters.
Rusia aktualisht kontrollon Krimesë, të cilën e aneksoi në 2014, pothuajse të gjithë Luhanskun, rreth 80% të Donetsk, 75% të Kherson dhe Zaporizhzhia, dhe pjesë të vogla të rajoneve Kharkiv, Sumy, Mykolaiv dhe Dnipropetrovsk.
Presidenti ukrainas, Volodymyr Zelenskiy, ka pranuar se disa territore të pushtuara nga Rusia mund të njihen si të pushtuara përkohësisht de facto, por ka përjashtuar çdo njohje de jure. Ai thotë se nuk ka mandat për të dhënë territor dhe se çdo tërheqje do të ekspozonte si Ukrainën ashtu edhe aleatët e saj evropianë ndaj sulmeve të reja ruse.
