Sulme të reja me raketa dhe dronë nga Rusia gjatë natës kanë shkaktuar të paktën katër viktima dhe 17 të plagosur në Ukrainë, sipas Guardian, që citon autoritetet lokale.
Në Kiev, dy persona humbën jetën dhe 13 të tjerë u plagosën pas një sulmi me raketa balistike në orët e para të së shtunës, njoftoi Timur Tkachenko, kreu i administratës ushtarake të qytetit. Tre nga të plagosurit janë shtruar në spital, sipas Shërbimit Shtetëror të Emergjencave të Ukrainës.
Një zjarr shpërtheu në një ndërtesë jo të banueshme, ndërsa mbetjet e raketave të rrëzuara ranë në një zonë të hapur, duke dëmtuar dritaret e ndërtesave përreth.
“Shpërthime në kryeqytet. Qyteti është nën sulm balistik,” shkroi në Telegram kryebashkiaku i Kievit, Vitali Klitschko, gjatë bombardimeve.
Në rajonin e Dnipropetrovskit, dy persona të tjerë u vranë dhe shtatë u plagosën, tha guvernatori në detyrë Vladyslav Haivanenko, duke shtuar se u dëmtuan ndërtesa banimi, shtëpi private, një dyqan dhe disa automjete.
Forcat ajrore të Ukrainës njoftuan se Rusia kishte lëshuar nëntë raketa dhe 62 dronë, nga të cilat katër raketa dhe 50 dronë u rrëzuan nga mbrojtja ajrore.
Nga ana tjetër, Ministria ruse e Mbrojtjes pretendoi se kishte rrëzuar 121 dronë ukrainas gjatë natës.
Sulmet ndodhën një ditë pasi presidenti ukrainas Volodymyr Zelenskyy i bëri thirrje Shteteve të Bashkuara të zgjeronin sanksionet ndaj sektorit të naftës ruse dhe kërkoi raketa me rreze të gjatë veprimi për t’u kundërpërgjigjur.
Zelenskyy ndodhej në Londër për takime me dy dhjetëra liderë europianë, të cilët kanë premtuar mbështetje ushtarake për Ukrainën në rast se arrihet një armëpushim. Takimi, i organizuar nga kryeministri britanik Keir Starmer, kishte për qëllim rritjen e presionit ndaj Vladimir Putinit, duke shtuar momentumin e sanksioneve të reja të SHBA-së dhe BE-së ndaj eksporteve ruse të naftës dhe gazit.
Gjatë diskutimeve u trajtuan edhe mënyrat për mbrojtjen e rrjetit energjetik të Ukrainës nga sulmet e përditshme me dronë e raketa, si dhe forcimi i mbrojtjes ajrore dhe furnizimi me raketa më të fuqishme, që mund të godasin brenda territorit rus. Zelenskyy ka kërkuar nga SHBA që të dërgojë raketat Tomahawk, një ide për të cilën është shprehur i hapur edhe presidenti Donald Trump.
