Kryeministri izraelit Benjamin Netanyahu pritet të thërrasë këtë javë Këshillin e Sigurisë pasi ministrat e kabinetit kritikuan vendimin për të forcuar zbatimin e armëpushimit në Gaza pas shkeljeve të së dielës — vendim që, sipas tyre, nuk u diskutua më parë në kabinet.
Në një bisedë me The Jerusalem Post, ministrat thanë se në takimin ku u miratua marrëveshja “nuk u fol për atë që vjen më pas” dhe se është e nevojshme të diskutohet vazhdimësia e planit të Trumpit, përfshirë se cilat forca të huaja, nëse do të ketë, do të operojnë në Rripin e Gazës, si do të duket procesi i çarmatimit të Hamasit dhe çështje të tjera thelbësore që kabineti nuk i ka trajtuar më parë.
Sulmet ajrore të së dielës u kryen si përgjigje ndaj një goditjeje me RPG ndaj një mjeti ushtarak, që rezultoi me vdekjen e dy ushtarëve të IDF nga Modi’in. Të hënën Izraeli i hoqi dorë sulmeve ndaj objektivave të Hamasit, ndërsa ndihmat humanitare hyjnë normalisht në Rripin e Gazës.
Presidenti i SHBA-së, Donald Trump, deklaroi të hënën se administrata e tij po ndërmerr shumë hapa për të ruajtur armëpushimin. Ai paralajmëroi gjithashtu se SHBA mund të japë sinjalin për një ndërhyrje të shpejtë ushtarake:
“Izraeli do të hyjë në Gaza me dy minuta paralajmërim nëse unë ua them. Për tani, nuk po e bëjmë këtë — po i japim Hamasit pak më shumë kohë. Nëse nuk sillet mirë, do të shkatërrohet,” tha presidenti.
Shtrohen prandaj pyetje të rëndësishme politike dhe strategjike për qeverinë izraelite: si do të menaxhohet faza tranzitore e armëpushimit, çfarë roli do të kenë ndërmjetësit dhe forcat ndërkombëtare, dhe si do të sigurohet që detyrimet e Hamasit — përfshirë çarmatimin dhe dorëzimin e pengjeve — të zbatohen pa rrezikuar rifillimin e përleshjeve.
