Mossad refuzoi të ekzekutonte një plan për të vrarë udhëheqësit e Hamasit në Katar, ndërsa forcat ajrore izraelite ndërmorën një sulm të rrallë me raketa balistike të lëshuara nga avionët F-15 dhe F-35 mbi Detin e Kuq, për të shmangur fluturimin mbi hapësirën ajrore arabe.
Lajmi u konfirmua për The Washington Post dhe The Wall Street Journal nga zyrtarë amerikanë dhe izraelitë, shkruan Ynet.
Sipas Wall Street Journal, Izraeli përdori tetë F-15 dhe katër F-35, duke lëshuar raketat mbi Detin e Kuq për të shmangur akuzat se kishte shkelur hapësirën ajrore të shteteve arabe.
Sensorë amerikanë në hapësirë zbuluan lëshimin e raketave dhe identifikuan Dohën si objektiv.
Zyrtarët amerikanë thanë se Izraeli e njoftoi Pentagonin vetëm disa minuta para nisjes së sulmit, pa lënë kohë për ta ndaluar.
“Mesazhi erdhi aq afër momentit të lëshimit sa nuk kishte mënyrë për ta ndaluar. Ishte plotësisht i pakuptueshëm,” tha një zyrtar i mbrojtjes në SHBA.
Presidenti Donald Trump u informua vetëm pasi raketat ishin lëshuar dhe urdhëroi të dërguarin e tij, Steve Witkoff, të paralajmëronte zyrtarët në Katar.
Por sipas Dohas, paralajmërimi mbërriti 10 minuta pas sulmit.
Sulmi dhe pasojat
Objektivi ishte një ndërtesë në Doha, ku udhëheqësit e Hamasit nuk ndodheshin në atë moment, por ishin afër, sipas burimeve arabe.
Disa zyrtarë të Hamasit mbetën të plagosur, ndërsa pesë operativë me rang më të ulët — mes tyre edhe djali i Khalil al-Hayya, një figurë e lartë e Hamasit — u vranë, si dhe një roje katariote.
Izraeli shpresonte të eliminonte al-Hayya, por Hamas publikoi prova se ai është gjallë. Vlerësimet brenda Izraelit po e konsiderojnë gjithnjë e më shumë si një operacion të dështuar.
Kundërshtimi i Mossad
Dy zyrtarë izraelitë thanë për Washington Post se drejtori i Mossad, David Barnea, kundërshtoi përdorimin e agjentëve në terren në Katar për të ekzekutuar atentatin.
Sipas tyre, Mossad paralajmëroi se një operacion i tillë mund të shkatërronte marrëdhëniet delikate me Katarin, i cili ka pritur udhëheqësit e Hamasit dhe ka luajtur rol kyç si ndërmjetësues në negociata.
“Nuk ka dyshim se duhet të synojmë të gjithë udhëheqësit e Hamasit, përfshirë ata jashtë vendit,” tha një burim izraelit, “por pse tani?”
Disa figura në aparatin e sigurisë së Izraelit kritikuan kohën e zgjedhur për sulmin, duke pyetur nëse ai do të ndihmonte në lirimin e pengjeve izraelite në Gaza apo vetëm do të provokonte një krizë të rëndë diplomatike.
Në vend të operacionit tokësor të Mossad-it, u zgjodh goditja me raketa balistike, por për momentin rezultatet konsiderohen të dështuara, pasi udhëheqësit kryesorë të Hamasit mbetën të paprekur.
