Presidenti francez Emmanuel Macron nuk pritet më të marrë pjesë në konferencën e ardhshme të OKB-së mbi njohjen e shtetit palestinez, kanë bërë të ditur burime diplomatike të martën për Jerusalem Post.
Sipas këtyre burimeve, Macron është përballur me kundërshtime të forta nga Britania e Madhe dhe Kanadaja, të cilat kanë paralajmëruar se një njohje e njëanshme nga Franca e shtetësisë palestineze mund të minojë përpjekjet ndërkombëtare për koordinim me Izraelin dhe të thellojë ndarjet mes vendeve partnere.
Presidenti francez, i cili fillimisht kishte planifikuar të bashkëdrejtonte konferencën së bashku me Arabinë Saudite, thuhej se kishte konsideruar edhe mundësinë për të shpallur njohjen zyrtare të shtetit palestinez nga ana e Francës — një pretendim që Parisi e ka mohuar në mënyrë të prerë.
Konferenca ishte parashikuar të mbahej në New York, nga data 17 deri më 20 qershor, dhe synonte të diskutonte për të ardhmen e Rripit të Gazës pas përfundimit të luftës midis Izraelit dhe Hamasit. Gjithashtu, ajo do të shërbente si një hap paraprak për njohjen graduale të shtetit palestinez nga komuniteti ndërkombëtar.
Megjithatë, samiti u shty për shkak të përshkallëzimit të luftës midis Izraelit dhe Iranit. Sipas burimeve të cituara nga portali izraelit Walla, edhe Shtetet e Bashkuara ushtruan presion të fshehtë diplomatik për të shtyrë mbajtjen e konferencës.
Një datë e re është caktuar për më 28 korrik.
