Në QSUT mungon një ilaç jetik për të sëmurët me kancerin e rrallë. Denoncimi është bërë në Report TV nga vajza e një pacienti, e cila tha se po has shumë vështirësi në gjetjen e tij, Ajo jeton në Gjermani por është kthyer pasi i ka të dy prindërit me tumor.
Babai i saj është diagnostikuar me limfomë kutane, një formë e rrallë tumori që shfaqet kryesisht në lëkurë në qelizat e gjakut të quajtura limfocite.
“Është realisht shumë e vështirë dhe diçka që s’di si të marr përgjigje. Problemi që unë kam është se te hematologjia duke qenë se babi im është pacientë i DLBCL, që është limfomë kutane, dhe për momentin po merr një kimioterapi që quhet CHOP. Por njëkohësisht duhet të marr edhe ilaçin Polatuzumab, i cili mungon. Babi e ka filluar kimioterapinë që në prill. Seancën e parë e ka marrë Polatuzumab. Ky ilaç mungon që prej prillit, ndërkohë jemi në qershor. Ky ilaç është jetik, pa këtë ilaç nuk mund të shërohet plotësisht. Babi Im po bën sot seancën e katërt dhe është hera e tretë që ilaçi mungon.” – thotë e reja.
Ajo ka pohuar se një dozë e mjekimit kushton nga 5 mijë deri në 7 mijë euro dhe e ka të pamundur që ta sigurojë.
“Kemi pyetur, sa kushton dhe se sa është mundësia që në ta sigurojmë vet këtë ilaç. Na kanë thënë që vetëm një dozë kushton nga 5 mijë deri në 7 mijë euro. Babit tim i duhen 6 doza, që i bie afro 30 mijë euro nëse do e siguronim vet këtë ilaç.” – shton më tej ajo.
Sipas Report Tv, Ministria e Shëndetësisë nuk ka bërë asnjë reagim pasi është kontaktuar lidhur me denoncimin.
