Forcat amerikane janë tërhequr nga dy baza të tjera ushtarake në verilindje të Sirisë, një zhvillim që, sipas komandantit të forcave kurde të mbështetura nga SHBA, po i hap rrugë ringjalljes së kërcënimit nga Shteti Islamik (ISIS).
Gazetarët e Reuters që vizituan bazat Al-Wazir dhe Tel Baydar gjatë javës së fundit panë se ato ishin kryesisht të braktisura, të ruajtura vetëm nga një numër i vogël luftëtarësh të Forcave Demokratike Siriane (SDF), një grup i udhëhequr nga kurdët që ka luftuar për vite me radhë kundër ISIS me mbështetjen e SHBA.
Pajisjet e vëzhgimit dhe kamerat ishin hequr, dhe tela me gjemba në perimetër ishin lëshuar, tregojnë pamjet e Reuters. Një politikan kurd që jeton në njërën nga bazat konfirmoi se nuk ka më ushtarë amerikanë aty. Gardianët e SDF-së në bazën tjetër pohuan se trupat janë larguar së fundmi, por nuk dhanë detaje të mëtejshme.
Ky është konfirmimi i parë në terren për tërheqjen e SHBA nga këto dy baza në provincën Hasaka. Me këtë, numri i bazave nga të cilat janë tërhequr trupat amerikane që nga marrja e detyrës nga Presidenti Donald Trump ka shkuar të paktën në katër.
Administrata Trump deklaroi këtë muaj se do ta reduktojë praninë ushtarake nga tetë në vetëm një bazë në verilindje të Sirisë.
The New York Times kishte raportuar në prill se numri i trupave do të binte nga rreth 2,000 në vetëm 500.
Komandanti i SDF, Mazloum Abdi, tha në një intervistë për Reuters në bazën Al Shadadi se ky numër nuk është i mjaftueshëm për të ndalur kërcënimin në rritje të ISIS: “Kërcënimi nga Shteti Islamik është rritur ndjeshëm së fundmi. Por ky është plani i ushtrisë amerikane. Ne kemi qenë të informuar dhe po punojmë bashkë për të shmangur boshllëqet në siguri,” tha ai.
Abdi refuzoi të komentojë mbi ndikimin e luftës së re mes Izraelit dhe Iranit në Sirinë e trazuar, por shprehu shpresën që konflikti të mos përhapet atje. Vetëm disa orë pas intervistës së tij, tre raketa të prodhimit iranian që synuan bazën Al Shadadi u shkatërruan nga sistemet mbrojtëse amerikane, sipas dy burimeve të sigurisë së SDF.
ISIS ringjallet në qytetet siriane
ISIS, i njohur gjithashtu si Daesh, sundoi pjesë të mëdha të Irakut dhe Sirisë midis viteve 2014 dhe 2017, duke ushtruar një regjim të dhunshëm dhe brutal. Organizata terroriste ekzekutoi civilë në sheshe publike, trafikoi seksualisht gra të minoritetit Yazidi dhe vrau gazetarë dhe punonjës ndihme.
Një koalicion ushtarak i udhëhequr nga SHBA me mbi 80 vende e çrrënjosi nga territoret që kontrollonte. Por që nga rrëzimi i presidentit sirian Bashar al-Assad në dhjetor nga grupet islamiste rivale, ISIS është fuqizuar sërish.
Abdi tha se celulat e ISIS janë bërë aktive në disa qytete siriane, përfshirë Damaskun, dhe se një grup xhihadistësh të huaj, të cilët më parë kishin luftuar kundër regjimit, i janë bashkuar radhëve të ISIS. Ai shtoi se grupi terrorist ka siguruar armë dhe municione nga depot e ushtrisë siriane në kaosin pas rrëzimit të Assadit.
Zyrtarë të tjerë kurdë konfirmuan për Reuters se luftëtarët e ISIS tashmë po lëvizin lirshëm pranë bazave amerikane të braktisura, përfshirë ato pranë qyteteve të Deir Ezzor dhe Raqqa, dikur bastione të tyre.
Në zonat e kontrolluara nga SDF në lindje të lumit Eufrat, ISIS ka ndërmarrë një sërë sulmesh, duke vrarë të paktën 10 luftëtarë të SDF dhe forca sigurie, tha Abdi. Ndër sulmet përfshihet edhe një bombë në rrugë që kishte në shënjestër një kolonë kamionësh nafte afër bazës ku ai dha intervistën.
