Më shumë se 17,000 banorë janë evakuuar nga provinca kanadeze e Manitobës ndërsa zjarret e fuqishme përhapen me shpejtësi në disa rajone të vendit, përcjell BBC. Përdorimi i avionëve ushtarakë dhe helikopterëve ka qenë i domosdoshëm për të evakuuar njerëzit nga zonat e largëta, ndërsa zjarrfikësit luftojnë me flakët në rritje. Parashikimi i motit tregon për ditë të nxehta dhe të thata, çka pritet të përkeqësojë situatën.
Sipas autoriteteve, më shumë se 188 zjarre janë aktive në të gjithë vendin, ndërsa tymi i dendur është përhapur jo vetëm në Kanada, por edhe në pjesë të Shteteve të Bashkuara. Provincat Saskatchewan dhe Manitoba kanë shpallur gjendje emergjente për një muaj dhe kanë kërkuar ndihmë ndërkombëtare për përballimin e krizës.
Në Saskatchewan, 17 zjarre janë aktualisht aktive, tetë prej të cilave janë jashtë kontrollit. Kryeministri i provincës, Scott Moe, paralajmëroi se numri i të evakuuarve mund të arrijë në 10,000 në ditët në vijim, ndërsa kërkoi reshje të dendura për të ndalur përhapjen e flakëve.
Edhe provincat Alberta dhe British Columbia kanë urdhëruar evakuime, ndërsa në qytetin Flin Flon të Manitobës, me një popullsi prej 5,000 banorësh, kanë mbetur vetëm zjarrfikësit dhe punonjësit e emergjencës. Në Manitoba janë aktive 25 zjarre, 11 prej të cilave janë jashtë kontrollit.
Parashikimi i motit nuk është premtues. Meteorologia Danielle Desjardins paralajmëron se një front i ftohtë që pritet të kalojë do të sjellë erëra të forta, por jo reshje në zonat e prekura, duke përkeqësuar përhapjen e zjarreve.
Tymi ka prekur edhe SHBA-në, ku rreth 22 milionë amerikanë janë nën alarme për cilësinë e ajrit, sidomos në Minnesotën veriore, ku është paralajmëruar se niveli i tymit është “i rrezikshëm për të gjithë”.
Kanadaja përjetoi sezonin më të rëndë të zjarreve në vitin 2023, me mbi 17 milionë hektarë të djegura. Ekspertët theksojnë se ndryshimet klimatike po krijojnë kushte gjithnjë e më të favorshme për përhapjen e zjarreve të egra, përmes nxehtësisë ekstreme dhe mungesës së lagështisë në tokë dhe vegjetacion.
