Dy persona, një 27-vjeçar me origjinë shqiptare dhe një 39-vjeçar italian, janë arrestuar nga oficerët e Policisë së Shtetit në Vigevano (Itali), gjatë dy operacioneve të njëpasnjëshme të zhvilluara nga mbrëmja e djeshme deri në mëngjesin e sotëm. Gjatë aksioneve, autoritetet sekuestruan 800 gramë kokainë, mbi 5,000 euro cash dhe një pushkë kalibri 22, që rezultoi e vjedhur në provincën e Varese në vitin 2023.
Operacioni nisi si pjesë e një fushate parandaluese ndaj trafikut të drogës, që çoi forcat e policisë pranë një institucioni publik, ku u konstatua dhe dokumentua shitja e 300 gramëve kokainë, të futura në një qese ngjashëm me ato të dhuratave.
Pasi arrestuan blerësin, oficerët nisën kërkime në ambientet e përdorura nga shitësi i dyshuar, i cili fillimisht kishte arritur të largohej. Gjatë kontrollit në një lokal dhe më pas në bodrumin e banesës, u zbuluan:
- Rreth 500 gramë kokainë
- Dy peshore precize
- Material për paketimin e drogës
- Mbi 5,000 euro
- Pushkë me optikë precize, e deklaruar e vjedhur
Të dy të dyshuarit janë ndaluar dhe ndodhen në Burgun e Pavias, në pritje të procedurave të mëtejshme gjyqësore. Autoritetet italiane e konsiderojnë operacionin një goditje të rëndësishme kundër trafikut të drogës në zonë.
