Administrata Amerikane e Ushqimit dhe Barnave (FDA) ka miratuar përfundimisht vaksinën kundër COVID-19 të kompanisë Novavax, por me kufizime të pazakonta që kanë ngjallur debat në komunitetin shkencor dhe politik.
Novavax prodhon të vetmen vaksinë në SHBA me bazë proteinike kundër koronavirusit – një teknologji më tradicionale në krahasim me vaksinat mRNA të Pfizer dhe Moderna. Deri më tani, vaksina e saj ishte e autorizuar për përdorim emergjent për personat 12 vjeç e lart.
Por të premten vonë, FDA i dha miratimin e plotë vetëm për përdorim tek të rriturit mbi 65 vjeç, ose për personat e moshës 12 deri 64 vjeç që kanë të paktën një problem shëndetësor që i ekspozon ndaj rrezikut të shtuar nga COVID-19.
Krahasuar me këtë, vaksinat e Pfizer dhe Moderna janë të licencuara plotësisht për të gjithë personat mbi 12 vjeç dhe të autorizuara për përdorim edhe tek fëmijët që nga mosha 6 muajshe.
Vendimi i FDA-së vjen në prag të një takimi që Këshilltarët e Qendrës për Kontrollin dhe Parandalimin e Sëmundjeve (CDC) do të mbajnë muajin e ardhshëm, ku do të diskutohet nëse do të rekomandohet ende vaksinimi vjetor kundër COVID-19 për të gjithë popullsinë apo vetëm për grupet në rrezik.
Vendimi i fundit për Novavax lë të kuptohet se administrata Trump ka marrë tashmë një vendim për këtë çështje, përpara se CDC të zhvillojë diskutimin e saj.
Drejtori ekzekutiv i Novavax-it, John C. Jacobs, e përshëndeti miratimin, duke thënë: “Kërkimet e tregut dhe statistikat e CDC-së tregojnë se individët më të moshuar dhe ata me gjendje shëndetësore të mëparshme janë grupet që më së shumti kërkojnë vaksinim sezonal kundër COVID-19. Ky është një hap i rëndësishëm drejt ofrimit të një alternative vaksinimi me bazë proteinike.”
Megjithatë, letra e miratimit të FDA-së nuk dha ndonjë shpjegim për kufizimet e vendosura. Sipas burimeve të afërta me çështjen që folën në kushte anonimiteti, këto kufizime pasqyrojnë skepticizmin që Sekretari i Shëndetësisë, Robert F. Kennedy Jr., dhe zyrtarë të tjerë të administratës Trump kanë ndaj vaksinave.
Fillimisht, Novavax kishte demonstruar sigurinë dhe efektivitetin e vaksinës në një provë klinike me 30,000 pjesëmarrës, dhe FDA ishte në rrugën për ta miratuar atë plotësisht pa kufizime deri më 1 prill. Por më vonë, FDA kërkoi që kompania të realizojë një provë shtesë pas miratimit – një kërkesë e rrallë për vaksinat tashmë të testuara.
Gjithashtu, FDA ka urdhëruar disa prova shtesë në vitet në vijim, për të hetuar nëse vaksina lidhet me sëmundje të caktuara të zemrës, si dhe për të vlerësuar nëse është i dobishëm vaksinimi i vazhdueshëm për personat nga mosha 50 deri në 64 vjeç që nuk kanë probleme të tjera shëndetësore.
VINI RE: Ky material është pronësi intelektuale e AP
