Kreu i Partisë Socialdemokrate (PSD), Tom Doshi, ka votuar sot në kuadër të zgjedhjeve të përgjithshme të 11 majit. Doshi ka ushtruar të drejtën e tij të votës në qendrën e votimit të vendosur në shkollën “Kongresi i Lushnjes”.
Partia Socialdemokrate, e drejtuar nga Doshi, garon në këto zgjedhje me numrin 11 në fletën e votimit. Procesi i votimit po zhvillohet në të gjithë 12 qarqet e vendit, ku përfshihen mbi 3.7 milionë qytetarë me të drejtë vote.
Në një prononcim për mediat pas votimit, Doshi ka theksuar se pret që rezultati i PSD-së në këto zgjedhje të jetë një surprizë në shkallë vendi.
I pyetur për mundësinë e krijimit të koalicioneve pas zgjedhjeve, Doshi ka deklaruar se është e sigurt që Partia Socialdemokrate nuk do të bashkëpunojë me kreun e Partisë Demokratike, Sali Berisha.
“Është dita më e rëndësishme për 4 vitet e ardhshme dhe kush do të jetë përfaqësues i qytetarëve në Kuvend. Kam shumë shpresë se rezultati për PSD do të jetë një surprizë në të gjithë Shqipërinë. Me zotin Berisha nuk bëj koalicion. Për sa i përket PS, do të shohim ecurinë e rezultatit,” – theksoi Doshi.
