Agjencia shtetërore e lajmeve e Koresë së Veriut, KCNA, tha të mërkurën se vendi kreu provën e parë të anijes së saj të re luftarake “Choe Hyon-class” më herët këtë javë.
Udhëheqësi Kim Jong Un dhe zyrtarë të tjerë morën pjesë në provë, ku u lançuan raketa lundrimi supersonike dhe strategjike, si dhe raketa kundërajrore.
Anija luftarake 5,000 tonëshe u emërua sipas luftëtarit revolucionar anti-japonez Choe Hyon.
Anija do të vihet në shërbim vitin e ardhshëm
KCNA raportoi se Kim ishte i impresionuar nga sulmi i fuqishëm i anijes dhe mbrojtja konvencionale dhe tha se ajo do të dislokohet vitin e ardhshëm.
Ai tha gjithashtu se kishte ardhur koha për “përshpejtim të armatimit bërthamor të marinës” për sovranitetin detar dhe për hir të mbrojtjes kombëtare.
Udhëheqësi i Koresë së Veriut tha se sistemi i fuqisë së zjarrit me bazë në anije i vendit “është kombinuar në mënyrë efektive” me “mjetet më të fuqishme të sulmit, duke përfshirë raketat supersonike lundruese, raketat strategjike lundruese dhe raketat balistike taktike”.
Ai tha se blerja e një nëndetëseje me energji bërthamore do të ishte hapi i madh i radhës.
Si reaguan Uashingtoni dhe Seuli?
Zyrtarët e mbrojtjes së Koresë së Jugut thanë se inteligjenca amerikane dhe ajo e Koresë së Jugut po monitoronin aktivitetet e Phenianit . Ekspertët besojnë se anija është e aftë të mbajë raketa anije-sipërfaqe dhe anije-ajër, bazuar në madhësinë e saj.
Uashingtoni dhe Seuli janë të shqetësuar për ndihmën ruse ndaj ambicieve bërthamore dhe ushtarake të Koresë së Veriut .
38 North, një grup ekspertësh që përqendrohet te Koreja e Veriut, i tha agjencisë së lajmeve Reuters se anija e klasës Choe Hyon mund të ketë nevojë për më shumë punë përpara se të mund të funksionojë me sistemin e vet të shtytjes. Ata thanë se një imazh satelitor tregonte anijen duke përdorur rimorkiatorë për ta shtyrë atë drejt një doku lundrues të thatë.
Yang Moo-jin, president i Universitetit të Studimeve të Koresë së Veriut në Seul, i tha AFP-së se anija e re thekson vendosmërinë e veriut për të fituar të ashtuquajturat aftësi operacionale në ujërat blu, duke iu referuar misioneve të kryera në rajone detare larg ujërave bregdetare të Koresë së Veriut./DW
