Kryeministri Edi Rama, gjatë një vizite në Maliq, e cilësoi këtë qytet si një histori suksesi në rrugën e zhvillimit dhe modernizimit. Ai theksoi se Maliqi ka pësuar një transformim të jashtëzakonshëm, duke u kthyer në një model për pjesën tjetër të vendit, falë mbështetjes së vazhdueshme të qeverisë dhe qytetarëve të tij.
“Maliqi është një bastion i palëkundur i Partisë Socialiste. Kjo bashki është transformuar totalisht, falë përkushtimit të përbashkët dhe bashkëpunimit me drejtuesit vendorë,” tha Rama, duke përmendur projekte konkrete si ndërtimi i infrastrukturës, rritja e mundësive për punësim dhe investimet në kulturë.
Një nga investimet më të dukshme, sipas Ramës, është rikonstruksioni i Pallatit të Kulturës, i cili sipas tij “është rilindur dhe i ka dhënë jetë të re qytetit”.
Në fjalimin e tij, kryeministri u bëri thirrje qytetarëve të Maliqit që më 11 maj të japin një mbështetje të fortë për Partinë Socialiste dhe për rrugën europiane të Shqipërisë. “Votoni për të ardhmen europiane të vendit. T’i japim një mesazh të qartë Europës se shqiptarët janë të vendosur për integrimin në BE,” u shpreh ai.
Rama nënvizoi se punët e nisura në Maliq janë vetëm fillimi dhe se qyteti do të vazhdojë të jetë një shembull i zhvillimit të qëndrueshëm në shkallë kombëtare.
