Republikanët në Komitetin e Sigurisë Kombëtare rekomanduan që Kongresi të fajësonte Sekretarin e Sigurisë Kombëtare për trajtimin e krizës kufitare.
Komiteti i Sigurisë Kombëtare të Kongresit miratoi dy nene të shkarkimit të mërkurën herët kundër Alejandro N. Mayorkas, Sekretarit të Sigurisë së Vendit, lidhur me trajtimin e tij të kufirit jugperëndimor, ndërsa republikanët po ecnin përpara me një padi partizane për politikat e emigracionit të Presidentit Biden.
Në një votim 18 me 15, paneli miratoi një rezolutë që akuzonte Mayorkas për kundërshtimin e zbatimit të ligjit dhe shkeljen e besimit të publikut duke dështuar në bllokimin e një numri të madh emigrantësh përtej kufirit të Shteteve të Bashkuara me Meksikën.
Ai krijoi terrenin për një votim në Kongres që pritet javën e ardhshme për një fajësim që do ishte një përshkallëzim i jashtëzakonshëm i një grindjeje politike midis republikanëve dhe demokratëve mbi emigracionin, duke e ngritur më tej çështjen në fillimin e një viti zgjedhor në të cilin ai pritet të jetë fokusi kryesor.
Republikanët kanë pretenduar se Mayorkas kreu krim ose akte korrupsioni, duke argumentuar në vend të kësaj se politikat kufitare të administratës Biden që ai zbatoi, binin ndesh me ligjin. Disa studiues ligjorë, kanë argumentuar se përpjekja është një çoroditje e fuqisë kushtetuese të fajësimit dhe demokratët mbeten fuqishëm kundër saj.
Nëse fajësohet, Mayorkas do bëhej Sekretari i dytë i kabinetit që do paditet nga Kongresi në historinë e SHBA-së dhe i pari në gati 150 vjet.
Akuzat pritet të rrëzohen në Senatin e kontrolluar nga Demokratët, ku do të kërkohej një shumicë prej dy të tretash për të dënuar dhe shkarkuar Mayorkas.
Por ata do detyronin një gjyq gjatë vitit zgjedhor që do nxiste atë që premton të jetë një debat politik i ngarkuar këtë vit mbi mënyrën se si të trajtohet një rritje e emigracionit në Shtetet e Bashkuara dhe kush duhet të fajësohet për atë që liderët e të dyja partive tani e konsiderojnë si krizën e emigracionit.
Një mbledhje gjithëditore e Komitetit të Sigurisë Kombëtare të martën, e cila u zvarrit deri në orët e vona të së mërkurës, ofroi një paraqitje të shkurtër të përplasjes së hidhur të asaj lufte.
Republikanët parashtruan rastin e tyre kundër Sekretarit dhe demokratët përdorën çdo mjet që kishin në dispozicion për të ndaluar shkarkimin ose për të ndryshuar akuzat, duke dështuar në mënyrë të përsëritur në një seri votash të linjës partiake.
Republikanët pretendojnë se politikat e administratës Biden dhe vendimet e Mayorkas në veçanti, kanë tërhequr valë emigrantësh në vend dhe kanë pranuar individë që mund të paraqesin rrezik për sigurinë kombëtare.
“Sekretari Mayorkas i ka vënë parapëlqimet e tij politike mbi ligjin,” tha Kongresmeni Mark E. Green, republikan i Tenesit dhe kryetar i panelit, në fillim të seancës së së martës. Ai shtoi se rezultatet e politikave kufitare të Mayorkas “kanë qenë katastrofike dhe kanë rrezikuar jetën e të gjithë amerikanëve”.
Demokratët kundërshtojnë se administrata Biden është përballur me valët rekord të emigrantëve në mënyrën më të mirë të mundshme, duke pasur parasysh burimet e kufizuara që Kongresi ka qenë i gatshëm t’i kushtojë për të adresuar sfidat.
Kongresmeni Mark E. Green, kryetari republikan i Komitetit të Sigurisë Kombëtare të Kongresit dhe kongresmeni Bennie Thompson, demokrati kryesor i panelit, gjatë seancës dëgjimore një orëshe të martën
Biden madje është zotuar të krijojë një kthesë nëse Kongresi miraton një marrëveshje dypartiake për të shtypur kërkesat për azil, për të zgjeruar kapacitetin e objekteve të paraburgimit dhe për të vendosur kufizime në numrin e emigrantëve që mund të lejohen në vend. Por ndërsa negociatorët e Senatit shpresojnë të finalizojnë një plan të tillë këtë javë, republikanët e Kongresit kanë thënë se nuk do ta pranojnë kurrë.
“Asnjë nga akuzat e fajësimit që komiteti do shqyrtojë sot nuk janë një krim apo kundërvajtje e rëndë,” tha Kongresmeni Bennie Thompson nga Misisipi, demokrati më i vjetër i panelit. Ai shtoi se republikanët e Kongresit “nuk duan përparim. Ata nuk duan zgjidhje. Ata duan vetëm të ngrenë një çështje politike.”
Republikanët, shumica e të cilëve në Kongres është tkurrur vetëm, do kenë nevojë për mbështetje pothuajse të njëzëshme për të fajësuar Mayorkas. Ata besojnë se mund ta arrijnë atë nivel, pavarësisht nga skepticizmi në radhët e tyre në lidhje me faktin nëse fajësimi është i justifikuar.
“Unë jam një “jo e dobët” në këtë pikë,” tha Kongresmeni Ken Buck, republikan i Kolorados, në një intervistë të martën, duke shtuar se ai kishte frikë se fajësimi i Mayorkas do të dëmtonte Kongresin institucionalisht dhe do “lëvizte në drejtimin e gabuar.”
“Të thuash se dikush ishte i paaftë, atëherë nuk do kishim askënd në Kongres, nëse standardi do ishte kompetenca,” shtoi zoti Buck.
Mayorkas ka kundërshtuar me forcë akuzat kundër tij: “Ju pretendoni se ne nuk kemi arritur të zbatojmë ligjet tona të emigracionit,” shkroi ai.
“Kjo është e rreme.”
Buck ishte një nga tetë republikanët kur Kongresmenia Marjorie Taylor Greene, republikane e Xhorxhias dhe një anëtare e panelit, u përpoq të detyronte një fajësim të menjëhershëm të Mayorkas në Kongres në nëntor.
Disa nga ai grup, si Kongresmeni Darrell Issa, republikan i Kalifornisë, janë zotuar që atëherë të mbështesin përpjekjet për të fajësuar Mayorkas, ndërsa të tjerë, si Kongresmeni Patrick McHenry, republikan i Karolinës së Veriut, thanë të martën se ata ende po e ndalonin gjykimin.
Republikanët e akuzojnë Mayorkas për shkeljen e dispozitave të Aktit të Emigracionit dhe Kombësisë që urdhërojnë që emigrantët të cilët nuk i plotësojnë kushtet për t’u pranuar në Shtetet e Bashkuara “do ndalohen” në pritje të largimit të tyre ose një vendimi për kërkesat e tyre për azil.
“Në vend që të pajtohet me këtë kërkesë, Alejandro N. Mayorkas ka zbatuar një skemë të kapjes dhe lirimit, sipas së cilës të huajt e tillë lirohen në mënyrë të paligjshme,” thuhet në një shkrim të fajësimit.
Ai akuzon gjithashtu Mayorkas se nuk ka marrë në paraburgim çdo emigrant të dëbuar për arsye kriminale ose terrorizmi dhe se ka “tejkaluar me dashje autoritetin e tij të lirimit me kusht” sipas ligjit për të lejuar kategori të mëdha emigrantësh në vend. Këtu përfshihen ukrainasit dhe afganët që ikin nga lufta dhe venezuelianë, haitianë dhe të tjerë që ikin nga vendet e shkatërruara ekonomikisht.
Por ligjet e emigracionit i japin presidentit dhe administratës së tij kompetenca të gjera për të trajtuar kufirin ashtu siç e shohin të arsyeshme.
Për shembull, i njëjti ligj që republikanët cituan në një nga nenet e fajësimit i jep gjithashtu administratës lirinë për të lejuar individët të hyjnë në vend përkohësisht për arsye humanitare ose për përfitim publik rast pas rasti – pa kufizime të mëtejshme se sa gjerësisht mund të aplikohet.
Kompetenca të tilla lirimi me kusht kanë ekzistuar që nga vitet 1950 dhe disa administrata – duke përfshirë ato të presidentëve Donald J. Trump, Barack Obama dhe George W. Bush – i kanë përdorur ato për të lejuar një numër të madh emigrantësh të jetojnë dhe punojnë përkohësisht në Shtetet e Bashkuara.
Kufiri SHBA-Meksikë
Një artikull i dytë i fajësimit e akuzon Mayorkas për pengimin e hetimit të republikanëve dhe se ka “bërë deklarata të rreme me vetëdije” për gjendjen e sigurisë në kufirin jugor me Meksikën. Kjo është një referencë për dëshminë që Mayorkas i dha Kongresit në vitin 2022 se departamenti i tij kishte “kontroll operacional” të kufirit.
Republikanët kanë argumentuar se kjo ishte dukshëm e rreme sipas Aktit të Kufirit të Sigurt të vitit 2006, i cili e përcakton termin si mungesë të çdo kalimi të paligjshëm të emigrantëve ose drogës.
Mayorkas ka thënë se ai po përdorte standardin shumë më të ulët të “kontrollit operacional” të përdorur nga Patrulla Kufitare, e cila e përkufizon termin si “aftësia për të zbuluar, përgjigjur dhe ndaluar depërtimet kufitare në zonat që konsiderohen si prioritet i lartë”.
Në një letër drejtuar panelit të martën, Sekretari, të cilin republikanët nuk e lejuan të dëshmonte publikisht në mbrojtjen e tij pas planifikimit të mosmarrëveshjeve, kundërshtoi me forcë akuzat.
“Ju pretendoni se ne nuk kemi arritur të zbatojmë ligjet tona të emigracionit,” shkroi Mayorkas.
“Kjo është e rreme.”
Ai tha se pretendimi i republikanëve se ai pengoi hetimet e tyre ishte “i pabazë dhe i pasaktë”.
Demokratët kanë argumentuar se republikanët po fajësojnë Mayorkas si pjesë e një strategjie për të mbajtur kufirin në kaos në mënyrë që Trump, i cili po marshon sërish drejt nominimit presidencial republikan, të mund të përfitojë nga pakënaqësia publike dhe të bëjë fushatë me një zotim për ta rregulluar atë.
“Republikanët po përjetësojnë sfidat në kufi për të ndihmuar në rizgjedhjen e Donald Trump”, shkruan demokratët në panelin e Sigurisë Kombëtare në një raport.
Ata pohuan se republikanët po përpiqen ta bëjnë Mayorkas një ‘kokë turku’ për problemet që mund t’i zgjidhte vetëm Kongresi.
“Ata po luajnë lojën e fajësimit politik për të larguar vëmendjen nga dështimi i tyre për të ndërmarrë veprime domethënëse për sigurinë kufitare dhe legjislacionin e emigracionit dhe për të siguruar financimin e nevojshëm të sigurisë kufitare”, thuhet në raport.
Republikanët pohojnë se Kushtetuta ofron liri të mjaftueshme për të fajësuar një zyrtar mbi atë që, në këtë rast, ata e quajnë “sjellje të keqe” të Mayorkas ndaj ligjit.
“Refuzimi i tij për t’iu bindur ligjit nuk është vetëm një shkelje kundër ndarjes së pushteteve në Kushtetutën e Shteteve të Bashkuara,” thotë një pjesë e fajësimit.
“Kjo gjithashtu kërcënon sigurinë tonë kombëtare dhe ka pasur një ndikim të tmerrshëm në komunitetet në të gjithë vendin.”
Sekretari i fundit i kabinetit që u fajësua, William W. Belknap, Sekretari i luftës nën Presidentin Ulysses S. Grant, u akuzua në 1876 për korrupsion dhe pjesëmarrje në një skemë ryshfeti. Më vonë ai u shpall i pafajshëm nga Senati.
VINI RE: Ky material është pronësi intelektuale e NY Times
