Grupi Parlamentar i Partisë Demokratike ka reaguar ashpër pas njoftimit të Kryetarit të Kuvendit, Niko Peleshi, për të mbledhur Këshillin për Rregulloren, Mandatet dhe Imunitetin më datë 15 prill.
Në qendër të kësaj mbledhjeje është shqyrtimi i kërkesës së SPAK për autorizimin e arrestimit të ish-zëvendëskryeministres Belinda Balluku, një proces që sipas opozitës po kryhet në shkelje të hapur të Kushtetutës.
Sipas PD-së, thirrja e këtij këshilli për të ndryshuar rregulloren e Kuvendit përpara se të zbardhet vendimi i plotë i Gjykatës Kushtetuese përbën një akt të paprecedent.
Opozita argumenton se projektvendimi që do të shqyrtohet përfshin dispozita që janë shfuqizuar tashmë nga Gjykata Kushtetuese, dhe procedimi pa u njoftuar vendimi i zbardhur cenon parimet bazë të shtetit ligjor.
“Ky njoftim bëhet në kushtet kur projektvendimi përkatës përfshin dispozita që janë shfuqizuar njëzëri nga Gjykata Kushtetuese, duke injoruar autoritetin e kësaj të fundit,” thekson Grupi i PD-së në reagimin e tij.
Akuzat për dy standarde
Opozita ka sjellë në vëmendje edhe atë që e cilëson si zvarritje të qëllimshme nga ana e kryeparlamentarit Peleshi. Sipas tyre, për tre muaj rresht, Kryetari i Kuvendit refuzoi të thërriste mbledhjen për çështjen “Balluku” me pretekstin se po priste zbardhjen e një vendimi tjetër të Gjykatës Kushtetuese, i cili sipas PD-së nuk kishte lidhje me procesin në fjalë.
“Për 3 muaj, Kryetari i Kuvendit z. Niko Peleshi refuzoi të thërriste mbledhjen… me arsyetimin se po priste zbardhjen e vendimit të Gjykatës Kushtetuese. Ndërkohë që në rastin konkret, Kryetari i Kuvendit ka ftuar deputetët në mbledhje, pa pritur zbardhjen e vendimit,” thuhet më tej në deklaratë.
Për Partinë Demokratike, ky veprim është një provokim i drejtpërdrejtë që dëshmon vullnetin e mazhorancës për të injoruar organet më të larta të drejtësisë.
“E konsiderojmë njoftimin e bërë si një veprim antikushtetues, që cenon parimet bazë të shtetit ligjor dhe cenon besimin e publikut tek autoriteti i padiskutueshëm i vendimeve të Gjykatës Kushtetuese,” përfundon reagimi i opozitës, duke paralajmëruar një përplasje të fortë ligjore dhe politike në mbledhjen e javës së ardhshme.
