Gjatë punimeve të Asamblesë së Partisë Socialiste në Lezhë, Kryeministri Edi Rama ka mbrojtur bilancin e qeverisë së tij në luftën kundër korrupsionit, duke e lidhur atë drejtpërdrejt me mundësinë për të rritur pagat dhe pensionet.
Rama pranoi se ky fenomen nuk është zhdukur plotësisht, por këmbënguli se niveli i tij është më i ulëti që ka njohur vendi.
Sipas shefit të qeverisë, zhurma e madhe që krijohet rreth temës së korrupsionit vjen si pasojë e dy faktorëve: intensifikimit të luftës ndaj këtij fenomeni dhe rezultateve konkrete që po arrihen.
“Unë nuk them që ne e kemi shfarosur korrupsionin, por mund ta faktoj në disa rrugë. Kurrë më përpara Shqipëria nuk e ka luftuar korrupsionin si në këtë fazë. Zhurma është më e madhe, pjesërisht nga lufta, por edhe nga rezultati,” — u shpreh Rama para socialistëve të Lezhës.
Kryeministri përdori një argument ekonomik për të hedhur poshtë akuzat e opozitës, duke thënë se është logjikisht e pamundur që korrupsioni të rritet paralelisht me përmirësimin e pagave dhe pensioneve.
Sipas tij, nëse paratë publike do të vidheshin si më parë, shteti nuk do të kishte resurse për rritje pagash.
“Si mund të ketë rritje të korrupsionit dhe të pagave në të njëjtën kohë? Nuk ndodh kjo. Si mund të ketë rritje të korrupsionit dhe të pensioneve në të njëjtën kohë? Këto të dyja bashkë nuk shkojnë,” — deklaroi ai, duke i cilësuar këto procese si të papajtueshme me njëra-tjetrën.
Për Ramën, fakti që sot Shqipëria ka mundësi të rishikojë skemat e pagave dhe të bëjë investime sociale, është dëshmia më e qartë se abuzimet me fondet publike janë reduktuar ndjeshëm.
Ai përfundoi duke thënë se qeveria do të vazhdojë të jetë e fokusuar te rezultatet, pavarësisht asaj që ai e quajti “zhurma politike” e ditës.
