Rreth 7 mijë përfaqësues të komuniteteve indigjene kanë protestuar në Brasilia, duke kundërshtuar grabitjen e tokave, aktivitetet minerare dhe prerjet e paligjshme të pyjeve, përcjell Euronews.
Marshimi u zhvillua përgjatë bulevardit të ministrive deri në Sheshin e Tre Pushteteve, duke qenë pjesë e mobilizimit më të madh indigjen në vend, i njohur si Free Land Encampment. Në këtë aktivitet morën pjesë rreth 200 grupe nga e gjithë Brazili.
Protestuesit i bënë thirrje presidentit Luiz Inácio Lula da Silva që të respektojë të drejtat e tyre dhe të mbrojë territoret indigjene, duke paralajmëruar se mbështetja për projekte nafte dhe zhvillimi bie ndesh me premtimet për mbrojtjen e tyre.
Aktivistët theksojnë se pushtimet e tokave nga minatorë dhe prerës pyjesh janë në rritje, ndërsa në disa zona, si në Bahia, raportohen edhe raste dhune.
Sipas studiuesve, mbrojtja e territoreve indigjene është një nga mënyrat më efektive për të frenuar shpyllëzimin në Amazonë, një ekosistem kyç për balancën klimatike globale.
