Greqia do të ndalojë aksesin në mediat sociale për fëmijët nën moshën 15 vjeç nga 1 janari 2027, tha të mërkurën kryeministri Kyriakos Mitsotakis, duke përmendur ankthin në rritje, problemet me gjumin dhe dizajnin varësie të platformave online.
Në një mesazh video drejtuar të rinjve, Mitsotakis tha se fëmijët që kalojnë orë të gjata para ekraneve nuk e lejojnë mendjen e tyre të pushojë dhe përballen me presion në rritje nga krahasimet e vazhdueshme dhe komentet në internet, shkruan Reuters.
Kryeministri grek tha se kishte folur me shumë prindër të cilët raportuan se fëmijët e tyre nuk flenë mirë, shqetësohen lehtë dhe kalojnë orë të gjata në telefonat e tyre.
Një sondazh i opinionit nga ALCO i publikuar në shkurt tregoi se rreth 80% e të anketuarve e miratuan ndalimin. Qeveria greke tashmë i ka ndaluar telefonat celularë në shkolla dhe ka krijuar platforma kontrolli prindëror për të kufizuar kohën e adoleshentëve para ekranit.
“Greqia do të jetë ndër vendet e para që do të ndërmarrë një iniciativë të tillë”, tha Mitsotakis. “Megjithatë, jam i sigurt se nuk do të jetë e fundit. Qëllimi ynë është ta shtyjmë Bashkimin Evropian edhe në këtë drejtim.”
