Raketa e misionit Artemis II u nis nga Qendra Hapësinore Kennedy në Florida, duke transportuar katër astronautë në një mision historik drejt Hënës. Nisja u ndoq nga dhjetëra mijëra njerëz të mbledhur në brigje dhe zona përreth, duke rikthyer atmosferën e epokës së misioneve Apollo, përcjell DW.
Misioni realizohet nga NASA dhe shënon rikthimin e fluturimeve njerëzore drejt Hënës për herë të parë që nga viti 1972.
Artemis II është misioni i dytë në programin Artemis dhe ka për qëllim testimin e anijes Orion, e cila do të përdoret për transportimin e astronautëve drejt Hënës dhe kthimin e tyre në Tokë.
Në bord ndodhen tre astronautë amerikanë dhe një kanadez, të cilët do të testojnë sistemet e fluturimit dhe do të marrin kontroll manual të anijes gjatë udhëtimit rreth Hënës.
Misioni pritet të zgjasë rreth 10 ditë dhe do të dërgojë ekuipazhin deri në rreth 406 mijë kilometra larg Tokës, duke shënuar distancën më të madhe të përshkuar ndonjëherë nga njerëzit në hapësirë.
Astronautët udhëtojnë me raketën Space Launch System, më e fuqishmja e ndërtuar ndonjëherë nga NASA, ndërsa kapsula Orion është projektuar për misione të avancuara hapësinore.
Një komponent kyç i Orion është moduli evropian i shërbimit, i ndërtuar nga Airbus në bashkëpunim me Agjencinë Evropiane të Hapësirës, që siguron energji, shtytje dhe mbështetje jetike për ekuipazhin.
Edhe pse astronautët nuk do të zbresin në Hënë në këtë mision, Artemis II konsiderohet një hap i rëndësishëm drejt rikthimit të njeriut në sipërfaqen hënore.
NASA synon një ulje të re në Hënë rreth vitit 2028, ndërsa në plan afatgjatë synohet dërgimi i njerëzve në Mars në dekadat e ardhshme.
