Presidenti i Shtetet e Bashkuara, Donald Trump, deklaroi se Irani ka kërkuar armëpushim, por theksoi se çdo vendim do të varet nga rihapja e Ngushticës së Hormuzit.
“Do ta shqyrtojmë kur Ngushtica e Hormuzit të jetë e hapur, e lirë dhe e sigurt,” shkroi Trump në platformën e tij Truth Social, duke shtuar se deri atëherë SHBA do të vazhdojnë presionin ushtarak ndaj Iranit.
Deklarata e tij vjen në një moment kur konflikti njëmujor mes SHBA-së, Izraelit dhe Iranit vazhdon të ndikojë rëndë tregjet globale të energjisë dhe përpjekjet diplomatike.
Megjithatë, pretendimi i Trump u kundërshtua menjëherë nga Teherani. Ministri i Jashtëm iranian, Abbas Araghchi, deklaroi se nuk ka negociata në zhvillim dhe se Irani nuk ka paraqitur asnjë propozim apo kusht për armëpushim.
Ndërkohë, presidenti iranian Masoud Pezeshkian nuk ka bërë një kërkesë zyrtare për armëpushim, duke shtuar paqartësitë mbi situatën reale diplomatike.
Lufta ka shkaktuar luhatje të forta në tregjet financiare dhe rritje të çmimeve të karburanteve, pasi mbyllja e Ngushticës së Hormuzit ka ndërprerë një nga rrugët më të rëndësishme të eksportit të naftës dhe gazit nga Gjiri Persik.
Pavarësisht sinjaleve të përziera, deklaratat e fundit kanë rritur shpresat për një ulje të përkohshme të tensioneve, edhe pse analistët paralajmërojnë se pa një marrëveshje të qartë për Hormuzin, kriza energjetike mund të vijojë.
