Kreu i Partisë Demokratike, Sali Berisha, i ka drejtuar një apel të veçantë pensionistëve, duke i ftuar të reagojnë ndaj mënyrës se si, sipas tij, trajtohen nga qeveria e drejtuar nga Edi Rama.
Në deklaratën e tij, Berisha vlerësoi kontributin e pensionistëve në zhvillimin e vendit dhe sakrificat që ata kanë bërë ndër vite për familjen dhe shoqërinë shqiptare. Ai kritikoi mënyrën se si, sipas tij, kjo kategori sociale trajtohet aktualisht, duke pretenduar se politikat qeveritare nuk u garantojnë një nivel jetese dinjitoz.
Berisha kundërshtoi planin e rritjes së pensioneve të propozuar nga qeveria, duke argumentuar se përqindjet e përmendura nuk përbëjnë një përmirësim real të situatës ekonomike të pensionistëve. Ai u shpreh se qytetarët kanë përvojë të mjaftueshme për të gjykuar politikat publike dhe për të vlerësuar ndikimin e tyre në jetën e përditshme.
Në këtë kuadër, ai deklaroi se objektivi i opozitës është rritja graduale e pensioneve dhe pagave të ulëta, duke synuar, sipas tij, arritjen e niveleve më të larta në rajon për këto kategori. Ai përmendi gjithashtu angazhimin për garantimin e minimumit jetik si bazë për përmirësimin e mirëqenies sociale.
Në përfundim, Berisha bëri thirrje për pjesëmarrje në protestën e paralajmëruar, duke ftuar qytetarët e Tiranës dhe të gjithë vendit të bashkohen në një tubim paqësor për të kërkuar, sipas tij, llogaridhënie dhe respektim të ligjit. Ai njoftoi gjithashtu vijimin e protestave në ditët në vijim, si pjesë e aksionit politik të opozitës.
“Një thirrje të veçantë kam për pensionistët. Ngrihuni dhe mos pranoni këtë poshtërim që po bën ndaj jush. Askush nuk ka kontribuar në vendin e vet më shumë se ju. Askush nuk ka sakrifikuar për familjen dhe shoqërinë shqiptare se sa ju. Dhe tani u trajton si qenie lëmoshe. Si lypsarë. Tani u trajton me çnjerëzinë më të madhe. Të bashkohemi të gjithë kundër tij. Do t’ua bëj pensionet në krye të katër viteve. Lexoni mirë se ç’do bëjë mashtruesi. Do e rrisë dy herë nga 4 dhe 8 përqind. Kjo qenka rritja? Dhe përdor një gjuhë mashtruesi ndaj jush. Po ju e keni parë vetë, keni 13 vite. Ju keni eksperiencën e jetës, ju nuk mund të mashtroheni në këtë mënyrë nga një njeri që nuk ka nder as moral. Ndaj dhe t’i japim duart sa më parë. Dhe fjala dhe zotimi ynë solemn është se përveç minimumit jetik, nis vrapi i rritjes së pensioneve dhe rrogave të ulëta gjersa ju të jeni pensionistët me pensionet më të larta në rajon. Gjersa ju të jeni rrogëtarët me rrogat më të larta në rajon. Dhe ky është zotimi ynë. Por duhet të largojmë. Me 17 kemi ditën e kryengritjes së madhe paqësore. Ftoj qytetarët e Tiranës dhe mbarë Shqipërisë të bashkohemi për t’i thënë Edi Ramës se vendi yt është para ligjit, para ligjit, para ligjit. Të hënën tjetër, në ora 7 në këtë shesh, përsëri për t’i marrë fytyrën atij që nuk ka fytyrë, Edi Ramës.” – tha Berisha.
