Të paktën 30 persona janë vrarë pas një sulmi të armatosur në një komunitet universitar në Nigeri, në shtetin qendror të Plateau.
Sulmi ndodhi gjatë natës në zonën Angwan Rukuba, ku persona të armatosur, ende të paidentifikuar, qëlluan në mënyrë të rastësishme mbi banorët.
Sipas dëshmitarëve dhe zyrtarëve lokalë, numri i viktimave ka arritur në të paktën 30, ndërsa shumë të tjerë janë plagosur dhe po marrin trajtim në spital, përcjell JP.
“Ndërsa flas me ju, numri ka arritur në 30… Ka të plagosur në spital, por nuk mund të konfirmoj numrin e tyre,” tha një përfaqësues lokal i të rinjve.
Autoritetet e shtetit Plateau njoftuan se autorët e sulmit nuk janë identifikuar dhe vendosën një shtetrrethim 48-orësh në zonë. Ndërkohë, University of Jos ka pezulluar provimet që pritej të nisnin këtë javë.
Rajoni i njohur si “Brezi i Mesëm” në Nigeri është përballur shpesh me dhunë të përgjakshme, e lidhur me konfliktet mes fermerëve dhe barinjve, të nxitura nga konkurrenca për tokë dhe burime.
Ky është një tjetër episod i rëndë i dhunës në vend, që thekson pasigurinë e vazhdueshme në këtë pjesë të Nigerisë.
