Një operacion policor ndërkufitar në Greqi, Spanjë dhe Bullgari ka shkatërruar një rrjet kriminal të udhëhequr nga turqit, i cili dyshohet se trafikonte armë zjarri nga Ballkani Perëndimor dhe Turqia drejt Bashkimit Evropian, në shkëmbim të kanabisit nga Spanja, pjesa dërrmuese e të cilit përfundonte në Greqi, njoftuan zyrtarët të hënën.
Agjencia policore Europol tha se armët hibride me kosto të ulët, por plotësisht funksionale — të cilat kombinojnë pjesë origjinale me ato të punuara me dorë — janë veçanërisht të vështira për t’u gjurmuar dhe u përdorën si mjet këmbimi në pazaret e drogës brenda BE-së.
“Kjo rrjedhë e vazhdueshme armësh rriti ndjeshëm fuqinë e zjarrit të grupeve të krimit të organizuar dhe kontribuoi në dhunën në mbarë Evropën,” thuhej në një deklaratë të Europol-it.
Policia e Greqisë bëri me dije përmes një deklarate se oficerët grekë ndaluan përkohësisht gjashtë persona — pesë shtetas turq dhe një grua greke — në Selanik si pjesë e operacionit të përbashkët, si dhe kontrolluan katër lokacione.
Sipas Europol-it, i dyshuari kryesor që u arrestua në Sofje të Bullgarisë, është një shtetas turk me leje qëndrimi greke. Ai besohet se ka koordinuar sigurimin dhe transportin e armëve të zjarrit në Spanjë, duke mbikëqyrur njëkohësisht blerjen dhe shpërndarjen e mëtejshme të drogës në vende të tilla si Greqia dhe Bullgaria.
Gjithsej u arrestuan 21 persona — 18 në Spanjë dhe tre në Bullgari — më 23 mars, ndërkohë që policia sekuestroi 587 kilogramë marijuanë dhe 76 kilogramë hashish, me një vlerë të vlerësuar në tregun e zi prej 4.4 milionë eurosh. Oficerët konfiskuan gjithashtu shtatë pistoleta gjysmë-automatike, një armë të kalibrit ushtarak, silenciatorë dhe shurdhues zhurme.
Europol tha se hetimi nisi në mars të vitit 2025, pasi policia spanjolle vuri re një rritje të fluksit të armëve nga Turqia drejt grupeve kriminale në Katalonjë, “në një sfond të rritjes së dhunës së armatosur.”
Hetuesit konstatuan se armët kontrabandoheshin në BE përmes veturave dhe kamionëve me hapësira të fshehura dhe dërgoheshin në Spanjë. Në drejtimin tjetër, vlerësohet se rrjeti kishte kapacitetin për të transportuar deri në 1.5 ton marijuanë në muaj nga Katalonja drejt Greqisë dhe Turqisë, ku vlera e saj rritej ndjeshëm.
Grupet turke të krimit të organizuar janë bërë gjithnjë e më aktive në Greqi gjatë viteve të fundit, shkruan Ekathimerini.
