Irani ka raportuar një sulm ndaj një objekti për prodhimin e koncentratit të uraniumit, i njohur si “yellowcake”, në rajonin e Yazd-it, ndërsa Izraeli ka zgjeruar operacionet duke goditur edhe impiante të mëdha të çelikut të lidhura me industrinë ushtarake iraniane.
Sipas mediave iraniane, objekti i goditur përdoret për prodhimin e pluhurit të uraniumit në fazat e hershme të procesit të pasurimit.
Në këtë fazë, minerali i uraniumit shndërrohet në “yellowcake”, i cili më pas përpunohet në gaz uraniumi (UF6) për t’u përdorur në centrifuga. Autoritetet iraniane thanë se nuk është regjistruar asnjë rrjedhje radioaktive pas sulmit, sipas Ynet.
Nuk ka pasur konfirmim të menjëhershëm nga autoritetet izraelite për këtë goditje.
Sulmi i raportuar vjen vetëm disa orë pasi ushtria izraelite goditi dy nga uzinat më të mëdha të çelikut në Iran, duke synuar, sipas zyrtarëve të mbrojtjes, dëmtimin e kapaciteteve ekonomike dhe ushtarake të vendit.
Sipas burimeve iraniane, objektivat përfshinin kompaninë “Mobarakeh Steel” në Isfahan dhe “Khuzestan Steel” në Ahvaz, pranë kufirit me Irakun. Zyrtarët izraelitë pretendojnë se këto objekte janë pjesë e zinxhirit industrial ushtarak dhe lidhen me Gardën Revolucionare Islamike.
Ministri izraelit i Mbrojtjes, Israel Katz, deklaroi se sulmet do të “intensifikohen dhe zgjerohen ndaj objektivave dhe sektorëve të tjerë që mbështesin regjimin në ndërtimin e armëve kundër civilëve izraelitë”. Ai shtoi se Irani do të “paguajë një çmim gjithnjë e më të lartë” për sulmet ndaj Izraelit.
Industria e çelikut konsiderohet një sektor kyç për ekonominë iraniane, ndërsa disa prej kompanive të goditura kanë qenë më parë nën sanksione amerikane për lidhje me strukturat e sigurisë dhe financimin e milicive si Basij.
Zhvillimet e fundit tregojnë për një përshkallëzim të mëtejshëm të konfliktit, me goditje që tashmë synojnë jo vetëm objektiva ushtarake, por edhe infrastrukturë strategjike ekonomike dhe bërthamore.
