Izraeli nuk është befasuar nga deklarata e Presidentit të SHBA-së, Donald Trump, për zhvillimin e “bisedimeve të mira dhe produktive” me Iran, si dhe nga vendimi i tij për të pezulluar për pesë ditë kërcënimin për sulme ndaj infrastrukturës energjetike iraniane, bëjnë të ditur zyrtarë izraelitë.
Megjithatë, autoritetet iraniane kanë mohuar menjëherë që të ketë pasur negociata, duke deklaruar se nuk janë zhvilluar bisedime me Shtetet e Bashkuara.
Sipas burimeve izraelite, pavarësisht deklaratave publike, prapa skenave po zhvillohen kontakte intensive mes SHBA dhe Iranit, si në mënyrë të drejtpërdrejtë, ashtu edhe përmes ndërmjetësimit të Katarit dhe Turqisë, me synimin për të arritur një marrëveshje, përcjell Ynet.
Zyrtarët theksojnë se një nga skenarët që po diskutohet parashikon rihapjen e Strait of Hormuz nga ana e Iranit në një fazë fillestare, ndërsa SHBA do të përmbahej nga sulmet ndaj centraleve energjetike iraniane. Në një fazë të dytë do të synohej një armëpushim më i gjerë.
Izraeli kishte mbështetur më parë mundësinë e një sulmi të gjerë ndaj infrastrukturës energjetike iraniane, pavarësisht rrezikut të kundërpërgjigjes. Por, sipas një zyrtari diplomatik, Tel Avivi pritet të rreshtohet me vendimet e administratës Trump.
Ndërkohë, kanalet e komunikimit përfshijnë edhe të dërguarin amerikan Steve Witkoff dhe ministrin e Jashtëm iranian Abbas Araghchi, ndërsa rolin kryesor ndërmjetësues e luan Katari, me mbështetjen e Turqisë.
Analisti Danny Citrinowicz vlerëson se vendimi i SHBA reflekton shqetësimet për përshkallëzim të konfliktit. “Trump u tërhoq i pari, duke kuptuar se një goditje ndaj infrastrukturës energjetike të Iranit do të sillte kundërpërgjigje të fortë,” u shpreh ai.
Ai shtoi se, nga këndvështrimi i Teheranit, situata përbën një arritje. “Irani nuk është dorëzuar dhe mund të ketë detyruar Uashingtonin të rishikojë objektivat e tij,” tha Citrinowicz, duke theksuar se fokusi amerikan duket se po zhvendoset nga ndryshimi i regjimit drejt rihapjes së korridorit strategjik detar.
Në të njëjtën linjë, kryeministri i Katarit, Mohammed bin Abdulrahman Al Thani, zhvilloi një bisedë me ministrin e Jashtëm turk Hakan Fidan, ku u diskutuan përpjekjet për uljen e tensioneve dhe rikthimin në negociata.
Sipas zyrtarëve, palët kanë theksuar rëndësinë e garantimit të sigurisë energjetike globale dhe lirisë së lundrimit, duke kërkuar koordinim ndërkombëtar për të shmangur përkeqësimin e mëtejshëm të situatës në rajon.
