Partia Socialiste ka miratuar ndryshime të rëndësishme në drejtimin politik të qarqeve gjatë Asamblesë së zhvilluar në Gjirin e Lalzit, në funksion të përgatitjeve për zgjedhjet vendore të vitit 2027.
Ndryshimi më i spikatur është në qarkun e Tiranës, ku Taulant Balla merr drejtimin politik, duke zëvendësuar Elisa Spiropalin, së cilës i reduktohen ndjeshëm përgjegjësitë në parti.
Në të njëjtën kohë, Belinda Balluku rikonfirmohet në Fier, ndërsa disa qarqe në veri u besohen figurave të reja, përfshirë ministra të sapoemëruar. Enea Karakaçi merr drejtimin e Shkodrës, ndërsa Ermal Nufi atë të Lezhës.
Ristrukturimi vjen pas analizës së rezultateve zgjedhore, ku Tirana dhe Kukësi rezultojnë si qarqet e vetme me rënie të mbështetjes për socialistët. Kryeministri Edi Rama e lidhi rezultatin në Tiranë edhe me arrestimin e kryebashkiakut Erion Veliaj në fillim të vitit 2025.
Në kuadër të ndryshimeve, Blendi Klosi kalon në drejtimin e qarkut Durrës, ndërsa Ulsi Manja rikthehet në Dibër. Ndërkohë, disa drejtues konfirmohen në pozicionet e tyre, si Niko Peleshi në Korçë, Bledi Çuçi në Vlorë dhe Mirela Kumbaro në Gjirokastër.
Asambleja miratoi gjithashtu nisjen e një fushate për zgjerimin e partisë në diasporë, me regjistrime që do të zhvillohen nga 30 marsi deri më 30 shtator në disa vende, përfshirë Italinë, SHBA-në dhe Gjermaninë.
Kryeministri Rama theksoi se objektivi kryesor mbetet forcimi i organizimit dhe rritja e përfaqësimit, veçanërisht të grave, të cilat aktualisht përbëjnë vetëm 34% të anëtarësisë në parti.
