Egjipti zbuloi të dielën restaurimin e dy statujave kolosale të një faraoni të shquar në qytetin jugor të Luksorit, ngjarja më e fundit në kuadër të aktiviteteve arkeologjike të qeverisë që synojnë tërheqjen e më shumë turistëve në vend.
Statujat gjigante prej alabastre, të njohura si Kolosët e Memnonit, u rimontuan në një projekt rinovimi që zgjati rreth dy dekada. Ato përfaqësojnë Amenhotep III, i cili sundoi Egjiptin e lashtë rreth 3,400 vjet më parë.
“Sot po festojmë përfundimin dhe ngritjen e këtyre dy statujave kolosale,” tha Mohamed Ismail, sekretar i përgjithshëm i Këshillit të Lartë të Antikiteteve, për Associated Press përpara ceremonisë.
Përpjekjet për të ringjallur një tempull prestigjioz
Ismail tha se kolosët kanë rëndësi të madhe për Luksorin, një qytet i njohur për tempujt e tij antikë dhe antikitete të tjera. Ato janë gjithashtu një përpjekje për të “ringjallur pamjen që ky tempull funerale i mbretit Amenhotep III kishte shumë kohë më parë,” tha Ismail.
Amenhotep III, një nga faraonët më të shquar, sundoi gjatë 500 viteve të Mbretërisë së Re, që ishte periudha më e begatë për Egjiptin e lashtë. Faraoni, mumja e të cilit ekspozohet në një muze në Kajro, sundoi midis viteve 1390–1353 p.e.s., një periudhë paqësore e njohur për prosperitetin dhe ndërtimet e mëdha, përfshirë tempullin e tij mortor, ku ndodhen Kolosët e Memnonit, dhe një tempull tjetër, Soleb, në Nubia.
Kolosët u rrëzuan nga një tërmet i fortë rreth vitit 1200 p.e.s., i cili shkatërroi gjithashtu tempullin funerale të Amenhotep III, tha Mohamed Ismail.
Ato ishin fragmentuar dhe pjesërisht ishin marrë si gurë guroreje, me bazamentet e tyre të shpërndara. Disa nga blloqet e tyre u ripërdorën në tempullin e Karnakut, por arkeologët i kthyen ato për të rindërtuar kolosët, sipas Ministrisë së Antikiteteve.
Në fund të viteve 1990, një mision egjiptiano-gjerman, i kryesuar nga egjiptologia gjermane Hourig Sourouzian, filloi punën në zonën e tempullit, duke përfshirë montimin dhe rinovimin e kolosëve. “Ky projekt ka në mendje… të shpëtojë mbetjet e fundit të një tempulli dikur prestigjioz,” tha ajo.
Një Faraon përballë diellit që lind
Statujat tregojnë Amenhotep III të ulur me duart mbështetur mbi kofshë, me fytyrat e tyre të kthyea nga lindja drejt Nilit dhe diellit që lind. Ato mbajnë mbulesën e kokës nemes të mbuluar nga kurorat e dyfishta dhe fundin mbretëror me pala, që simbolizon sundimin hyjnor të faraonit. Dy statuja të tjera të vogla në këmbët e faraonit paraqesin gruan e tij, Tiye.
Kolosët — përkatësisht 14.5 metra dhe 13.6 metra të lartë — qëndrojnë në hyrje të tempullit të mbretit në bregun perëndimor të Nilit. Kompleksi prej 35 hektarësh besohet të jetë tempulli më i madh dhe më i pasur në Egjipt dhe zakonisht krahasohet me tempullin e Karnakut, gjithashtu në Luksor, shkruan AP.
Kolosët u gdhendën në alabastër egjiptian nga guroret e Hatnub-it, në Egjiptin e Mesëm. Ato u fiksuan mbi bazamente të mëdha me mbishkrime që tregojnë emrin e tempullit, si dhe të gurores.
Ndryshe nga skulpturat e tjera monumentale të Egjiptit të lashtë, kolosët u compiliuan pjesërisht me pjesë të gdhendura veçmas, të cilat u fiksuan në bërthamën kryesore monolite prej alabastre të çdo statuje, njoftoi ministria.
