Disa shpërthime të forta janë raportuar në Dubai gjatë së martës, mes tensioneve të larta në rajon.
Autoritetet në Emiratet e Bashkuara Arabe kanë bërë të ditur se sistemet e mbrojtjes ajrore janë aktivizuar për t’iu përgjigjur kërcënimeve nga raketa dhe dronë të ardhur nga Irani. Sipas tyre, zhurmat e forta që janë dëgjuar në qytet lidhen kryesisht me interceptimin e këtyre objekteve në ajër, dhe jo domosdoshmërisht me goditje direkte në tokë.
Banorët kanë marrë gjithashtu njoftime emergjente për t’u strehuar, ndërsa autoritetet paralajmëruan për rrezikun që mund të vijë nga mbetjet e raketave të rrëzuara.
Ngjarja vjen në një moment përshkallëzimi të konfliktit në rajon, ku Emiratet raportojnë se janë përballur me një numër shumë të madh sulmesh ajrore që nga fillimi i luftës. Sipas burimeve zyrtare, mijëra dronë dhe raketa janë lëshuar drejt territorit të tyre gjatë javëve të fundit.
Ndërkohë, sulmet kanë shkaktuar edhe ndërprerje të trafikut ajror dhe vonesa në fluturime, pasi hapësira ajrore është mbyllur përkohësisht për arsye sigurie, përcjell Financial Times.
Deri më tani nuk ka raportime të konfirmuara për dëme të mëdha apo viktima nga incidenti i fundit në Dubai, por situata mbetet e tensionuar.
