Senatori republikan Markwayne Mullin është paraqitur përpara Komitetit të Sigurisë Kombëtare në Senat për seancën e konfirmimit, si kandidati i propozuar nga Donald Trump për të drejtuar Departamentin e Sigurisë Kombëtare.
Nëse konfirmohet, Mullin do të zëvendësojë Kristi Noem, e cila u shkarkua më herët këtë muaj pas kritikave të shumta për drejtimin e institucionit dhe menaxhimin e situatave të ndjeshme, përfshirë incidentet me pasoja fatale gjatë protestave në Minneapolis.
Gjatë seancës, Mullin u përball me pyetje të forta nga senatorët demokratë lidhur me qëndrimet e tij për përdorimin e forcës nga agjentët federalë.
I pyetur për deklaratat e mëparshme mbi vrasjen e një qytetareje gjatë një operacioni në Minneapolis, ai shmangu një përgjigje të drejtpërdrejtë nëse ishte penduar, duke theksuar se oficerët shpesh detyrohen të marrin vendime të shpejta në situata kritike, sipas AP.
Në një tjetër moment, ai kërkoi falje për komentet e mëparshme ndaj një personi tjetër të vrarë gjatë protestave, duke pranuar se kishte reaguar pa pasur të gjitha faktet.
“Reagova shumë shpejt, pa pasur informacion të plotë. Ky është gabimi im dhe nuk do të ndodhë si sekretar”, u shpreh Mullin.
Gjatë dëshmisë së tij, ai theksoi edhe marrëdhënien personale me Trump, duke e cilësuar atë si “mik”, dhe tregoi një histori personale lidhur me mbështetjen që kishte marrë nga presidenti pas një dëmtimi të rëndë të djalit të tij.
Kandidatura e Mullin vjen në një moment tensioni politik në Uashington, ku demokratët kërkojnë reforma në agjencitë e emigracionit, ndërsa administrata Trump vijon të shtyjë përpara politikat e deportimeve masive.
Republikanët shpresojnë se ndryshimi në krye të Departamentit do të ndihmojë në zbutjen e përplasjeve politike dhe në zhbllokimin e financimeve për këtë institucion.
