Një shpërthim ka dëmtuar një shkollë hebreje në Amsterdam, në një incident që autoritetet lokale e kanë cilësuar si një sulm të qëllimshëm ndaj komunitetit hebre.
Kryebashkiakja e qytetit, Femke Halsema, deklaroi se shpërthimi ndodhi gjatë natës dhe shkaktoi dëme të kufizuara në murin e jashtëm të ndërtesës në zonën Buitenveldert. Sipas autoriteteve, nuk raportohet për persona të lënduar.
“Ky është një akt frikacak agresioni ndaj komunitetit hebre,” tha Halsema, duke theksuar se Amsterdami duhet të mbetet një qytet ku hebrenjtë mund të jetojnë të sigurt, shkruan BBC.
Pas incidentit, zjarrfikësit dhe policia mbërritën menjëherë në vendngjarje, ndërsa hetuesit kanë nisur analizimin e pamjeve të kamerave të sigurisë, të cilat sipas mediave lokale tregojnë një person duke vendosur eksploziv pranë ndërtesës.
Autoritetet në Holandë kishin rritur tashmë masat e sigurisë në institucionet hebreje publike, pas një sulmi të dyshuar me zjarrvënie ndaj një sinagoge në Rotterdam një ditë më parë.
Në një deklaratë pas shpërthimit, Halsema tha se e kupton frikën dhe zemërimin e komunitetit hebre në qytet.
“Ata po përballen gjithnjë e më shumë me antisemitizëm dhe kjo është e papranueshme,” u shpreh ajo.
Policia ka nisur një hetim për të zbardhur rrethanat e sulmit dhe deri më tani nuk ka dhënë detaje mbi motivet e mundshme.
Incidenti vjen në një moment tensioni ndërkombëtar, pasi ekzistojnë shqetësime se komunitetet hebreje dhe amerikane në vende të ndryshme mund të bëhen objekt sulmesh pas operacioneve të përbashkëta ushtarake të Izrael dhe Shtetet e Bashkuara të Amerikës kundër Iran.
