Qeveria e SHBA-së ka marrë rreth 1 trilion dollarë borxh në pesë muajt e fundit që nga tetori, duke i shtuar kështu deficitit federal që po rritet me shpejtësi, raportoi Zyra e Buxhetit të Kongresit (CBO).
Vlerësimet erdhën mes raportimeve mediatike që pretendojnë se ushtria amerikane shpenzoi 5.6 miliardë dollarë municione gjatë dy ditëve të para të sulmit të saj ndaj Iranit.
Të hënën, CBO publikoi rishikimin e saj mujor të buxhetit, sipas të cilit borxhi i qeverisë amerikane u rrit me 308 miliardë dollarë vetëm në muajin shkurt. Ndër faktorët që kontribuojnë në këtë trend janë pagesat më të larta të interesit për të shlyer borxhin publik, si dhe rritja e shpenzimeve qeveritare, duke përfshirë ato të Departamentit Amerikan të Luftës.
Në vetëm pesë muaj, Thesari pagoi gjithsej 433 miliardë dollarë për të shlyer interesat e borxhit publik, i cili tani po i afrohet shifrës 38.9 trilionë dollarë.
Shqetësimet për qëndrueshmërinë
Maya MacGuineas, presidente e Komitetit për një Buxhet Federal të Përgjegjshëm (CRFB), një mbikëqyrës fiskal dypartiak, ka paralajmëruar se “kjo nuk mund të jetë e qëndrueshme”. Ajo u bëri thirrje politikëbërësve të reduktojnë deficitet, duke propozuar një raport të deficitit ndaj PBB-së (GDP) prej 3% si objektiv fillestar, shkruan Rt.
Në raportin e tij të fundit, grupi i ekspertëve (think-tank) pretendoi se SHBA “është pothuajse e sigurt se do të hyjë në goditjen e radhës më e borxhli se sa kemi qenë ndonjëherë më parë”.
Kostot e luftës
Ndërkohë, të martën, Washington Post, duke cituar zyrtarë anonimë, raportoi se ushtria amerikane hodhi 5.6 miliardë dollarë municione vetëm gjatë dy ditëve të para të sulmeve të saj në Iran. Sipas gazetës, administrata e Presidentit Donald Trump pritet t’i dërgojë Kongresit një kërkesë suplementare për buxhetin e mbrojtjes në ditët në vijim, e cila raportohet se mund të arrijë deri në 50 miliardë dollarë.
Ligjvënësit demokratë kanë shprehur gjithnjë e më shumë shqetësime mbi mungesën e dukshme të objektivave të qarta në fushatën ushtarake të Trump kundër Iranit, pasi presidenti ka dërguar mesazhe kontradiktore për këtë çështje.
Javën e kaluar, Politico pretendoi se Pentagoni priste që konflikti të zgjaste të paktën edhe 100 ditë të tjera, ose deri në shtator—një kontrast i madh me afatin fillestar prej katër javësh të Trump.
