Partia e Gjelbër në Gjermani ka arritur një fitore të ngushtë në zgjedhjet rajonale të shtetit Baden-Württemberg, duke i dhënë një goditje politike koalicionit qeverisës të kancelarit Friedrich Merz. Rezultati paraprak tregon se Alleanca 90/Të Gjelbrit fituan rreth 30.3% të votave, duke dalë pak përpara partisë konservatore CDU, e cila mori rreth 29.7%.
Ky shtet është një nga më të rëndësishmit ekonomikisht në vend, pasi është një qendër e industrisë automobilistike ku kanë selinë kompani të mëdha si Mercedes-Benz dhe Porsche. Për këtë arsye, rezultati shihet si një tregues i rëndësishëm i klimës politike dhe ekonomike në Gjermani.
Fitorja e të Gjelbërve lidhet kryesisht me popullaritetin e kandidatit të tyre, ish-ministrit federal të bujqësisë Cem Özdemir, i cili arriti të rrisë mbështetjen për partinë gjatë javëve të fundit të fushatës. Pas mbylljes së votimit, Özdemir e quajti rezultatin një “rikthim të jashtëzakonshëm”. Ai pritet të pasojë kryeministrin aktual të landit, Winfried Kretschmann, një figurë e njohur e të Gjelbërve që kishte vendosur të mos kandidonte më për një mandat tjetër pas më shumë se një dekade në pushtet.
Për konservatorët e CDU-së, rezultati është një zhgënjim i madh. Partia kishte udhëhequr sondazhet për një periudhë të gjatë dhe shpresonte se largimi i Kretschmann do t’i jepte mundësi të rikthente kontrollin mbi këtë bastion tradicional konservator. Kandidati i tyre kryesor, Manuel Hagel, u përball gjithashtu me kritika gjatë fushatës pasi një video e vjetër nga viti 2018 u bë publike dhe shkaktoi debat politik.
Ndërkohë, partia e skajit të djathtë Alternative for Germany (AfD) doli si fituesja më e madhe për nga rritja e votave. Ajo arriti rreth 18.7% dhe u rendit në vendin e tretë, duke dyfishuar mbështetjen e saj. Kandidati i saj në këtë shtet, Markus Frohnmaier, deklaroi se partia tashmë është vendosur si forca kryesore opozitare në jugperëndim të vendit, shkruan Politico.
Rezultati për SPD, partneri i koalicionit të Merz në nivel federal, ishte veçanërisht i dobët. Partia mori vetëm rreth 5.5% të votave, rezultati më i keq në historinë e saj në një zgjedhje federale ose rajonale. Bashkëdrejtuesja e SPD-së, Bärbel Bas, e përshkroi natën zgjedhore si “shumë të hidhur”.
Një tjetër zhvillim i rëndësishëm ishte dështimi i FDP për të kaluar pragun prej 5% për të hyrë në parlamentin e landit. Kjo është hera e parë në historinë e partisë që ajo nuk arrin të sigurojë përfaqësim në parlamentin e Baden-Württemberg, një rezultat që disa analistë e konsiderojnë potencialisht fatal për një parti që ka qenë pjesë e rëndësishme e politikës gjermane pas Luftës së Dytë Botërore.
Meqenëse asnjë parti nuk ka shumicë absolute, pritet që të Gjelbrit të formojnë përsëri një koalicion qeverisës me CDU-në në këtë shtet. Zgjedhjet konsiderohen gjithashtu si fillimi i një periudhe të ngarkuar elektorale në Gjermani, të quajtur shpesh “superviti zgjedhor”, pasi gjatë muajve të ardhshëm do mbahen edhe disa zgjedhje të tjera rajonale që mund të ndikojnë ndjeshëm në balancën politike në nivel kombëtar.
