Një zyrtar i lartë i Emirateve të Bashkuara Arabe deklaroi se lufta që përfshin Iranin mund të përfundojë më shpejt nga sa pritet, por paralajmëroi se pasojat në besimin mes vendeve të rajonit mund të zgjasin për dekada. Ai theksoi se Emiratet kërkojnë që Irani të ndalojë menjëherë sulmet ndaj shteteve të Gjirit, duke i cilësuar ato si agresion ndaj vendeve jo-luftuese, përcjell YNet.
Sipas tij, vendet e Gjirit janë përgatitur për një përshkallëzim të mundshëm të konfliktit, duke siguruar rezerva ushqimore dhe duke marrë masa për të përballuar çdo situatë emergjente. Megjithatë, ai shtoi se dëmi që kanë shkaktuar sulmet iraniane ka krijuar një hendek të madh besimi në rajon.
Zyrtari theksoi gjithashtu se çdo marrëveshje e ardhshme diplomatike me Iranin nuk do të fokusohet vetëm te programi bërthamor, por edhe te programi i raketave, i cili tashmë konsiderohet çështja kryesore e sigurisë në rajon.
Ai vlerësoi edhe mbështetjen ushtarake të Francës ndaj Emirateve, duke theksuar se avionët luftarakë Rafale kanë marrë pjesë që nga fillimi i konfliktit në patrullime dhe në interceptimin e raketave dhe dronëve.
Pavarësisht tensioneve, zyrtari theksoi se Emiratet e Bashkuara Arabe do të vazhdojnë të mbrojnë vendin dhe të punojnë për rikthimin gradual të stabilitetit në rajon, duke shtuar se ekonomia e vendit mbetet e fortë dhe tërheqëse për investime.
