Afganistani deklaroi se po qëllonte mbi avionët pakistanezë në Kabul, pasi shpërthimet dhe të shtënat me armë tronditën kryeqytetin të dielën, duke shtuar paqëndrueshmërinë në një rajon të tronditur tashmë nga sulmet e SHBA-së dhe Izraelit mbi Iran dhe sulmet hakmarrëse ndaj objektivave amerikane në shtetet e Gjirit.
Shteti i sunduar nga Talebanët ka pësuar sulme pakistaneze kundër instalimeve qeveritare gjatë javës së kaluar, pas akuzave të cilat ai i mohon, se strehon militantë.
Luftimet më të rënda në vite mes fqinjëve kanë ngritur frikën për një konflikt të zgjatur përgjatë kufirit të tyre prej 2,600 kilometrash, ndërsa disa vende, përfshirë Katarin dhe Arabinë Saudite, kanë bërë thirrje për përmbajtje dhe kanë ofruar ndihmë për të ndërmjetësuar një armëpushim.
Shpërthimet bënë jehonë në pjesë të Kabulit përpara agimit, të ndjekura nga breshëri të shtënash me armë zjarri, sipas një dëshmitari të Reuters, megjithëse mbeti e paqartë se çfarë ishte shënjestruar apo nëse kishte viktima. Zëdhënësi i administratës talebane, Zabihullah Mujahid, sqaroi se zhurmat ishin rezultat i shënjestrimit të avionëve pakistanezë mbi kryeqytet nga forcat afgane, duke u bërë thirrje banorëve të Kabulit që të mos shqetësoheshin.
Nga ana tjetër, zyra e kryeministrit të Pakistanit, ministria e informacionit dhe ushtria nuk iu përgjigjën kërkesave për koment. Kjo dhunë pason sulmet ajrore brenda Afganistanit këtë javë, për të cilat Pakistani tha se shënjestruan infrastrukturën militante, ndërsa Afganistani i përshkroi ato si shkelje të sovranitetit dhe njoftoi operacione hakmarrëse përgjatë kufirit të përbashkët. Irani, i cili kufizohet me të dyja vendet, kishte ofruar ndihmë për të lehtësuar dialogun përpara se të sulmohej vetë të shtunën nga Izraeli dhe SHBA-ja, me qëllim pakësimin e aftësive ushtarake iraniane.
Pakistani ka pohuar se Afganistani strehon militantët e Tehreek-e-Taliban Pakistan (TTP), të cilët sipas tij po zhvillojnë një kryengritje brenda Pakistanit, akuzë kjo që Afganistani e ka mohuar duke thënë se nuk lejon përdorimin e territorit të tij kundër vendeve të tjera.
Burimet pakistaneze të sigurisë njoftuan se operacioni “Ghazab Lil Haq” (Zemërimi për të Vërtetën) ishte në vazhdim dhe se forcat pakistaneze kishin shkatërruar poste dhe kampe afgane.
Të dyja palët kanë raportuar humbje të rënda, duke nxjerrë shifra të ndryshme viktimash për njëra-tjetrën, të cilat nuk mund të verifikoheshin në mënyrë të pavarur. Përpjekjet diplomatike janë intensifikuar me thirrje për bisedime nga Arabia Saudite, Rusia, Kina, Bashkimi Evropian dhe OKB-ja, ndërsa SHBA-ja deklaroi se mbështet të drejtën e Pakistanit për t’u mbrojtur.
Ministri i Mbrojtjes i Pakistanit, Khawaja Muhammad Asif, i përshkroi luftimet si “luftë të hapur”, ndërsa Ministri i Brendshëm i Afganistanit, Sirajuddin Haqqani, paralajmëroi se konflikti do të ishte “shumë i kushtueshëm”, duke shtuar se deri tani janë angazhuar vetëm forcat e vijës së parë dhe ushtria nuk është vendosur ende plotësisht, shkruan Reuters.
