Presidenti i SHBA-së, Donald Trump, tha të enjten në mbledhjen e parë të Bordit të tij të Paqes se kombet kanë kontribuar me 7 miliardë dollarë në një fond rindërtimi për Gazën, i cili synon të rindërtojë enklavën sapo Hamasi të çarmatoset, një objektiv që është ende larg realizimit.
Çarmatimi i militantëve të Hamasit dhe tërheqja shoqëruese e trupave izraelite, madhësia e fondit të rindërtimit dhe rrjedha e ndihmës humanitare për popullatën e dërrmuar nga lufta në Gazë, janë ndër pyetjet kryesore që pritet të testojnë efektivitetin e bordit në muajt e ardhshëm.
Në një sërë njoftimesh në fund të një fjalimi të gjatë para përfaqësuesve nga 47 kombe, Trump tha se Shtetet e Bashkuara do kontribuojnë me 10 miliardë dollarë për Bordin e Paqes.
Ai tha se kombet kontribuese kanë mbledhur 7 miliardë dollarë si një pagesë fillestare për rindërtimin e Gazës. Kombet kontribuese përfshinin Kazakistanin, Azerbajxhanin, Emiratet e Bashkuara Arabe, Marokun, Bahreinin, Katarin, Arabinë Saudite, Uzbekistanin dhe Kuvajtin, tha ai.
Trump e propozoi bordin në shtator, kur njoftoi planin e tij për t’i dhënë fund luftës së Izraelit në Gazë. Më vonë ai e bëri të qartë se kompetencat e bordit do zgjeroheshin përtej Gazës për të trajtuar konflikte të tjera në mbarë botën.
Trump tha se FIFA do mbledhë 75 milionë dollarë për projekte të lidhura me futbollin në Gazë dhe se Kombet e Bashkuara do kontribuojnë me 2 miliardë dollarë për ndihmë humanitare, shkruan Reuters.
Trump tha se Norvegjia do jetë mikpritëse e një eventi të Bordit të Paqes, por Norvegjia sqaroi se nuk i është bashkuar bordit.
