Kongresi i Perusë vendosi të martën shkarkimin e presidentit në detyrë, Jose Jeri, vetëm katër muaj pas marrjes së detyrës, pas një skandali që lidhej me takime të fshehta me biznesmenë kinezë. Ky vendim ka shkaktuar një valë të re pasigurie politike në vend, vetëm pak javë para zgjedhjeve presidenciale të planifikuara për 12 prill, përcjell DW.
Jeri po hetohet gjithashtu për “mbështetje të paligjshme të interesave” pas dy takimeve me biznesmenin Zhihua Yang, i cili zotëron dyqane dhe një koncesion shtetëror për një projekt hidroelektrik. Një prej biznesmenëve të përfshirë në takimin e parë akuzohet për pjesëmarrje në një rrjet të paligjshëm të tregtisë së drurit.
Skandali u bë publik pasi u shpërnda një video e takimeve. Në një takim në dhjetor 2025, Jeri shihet duke hyrë në një restorant vonë në mbrëmje me kapuç mbi kokë për t’u takuar me Yang. Në një takim tjetër në janar, ai ishte i veshur me syze dielli.
Presidenti në detyrë ka mohuar çdo shkelje dhe ka thënë se takimet kishin për qëllim organizimin e një feste për marrëdhëniet Perui-Kinë. Megjithatë, Kongresi argumentoi se akuzat e bëra e bënin Jeri të papërshtatshëm për të kryer detyrat presidenciale, duke justifikuar shkarkimin e tij.
