Komisioni Evropian njoftoi të martën se ka hapur procedura formale ndaj Shein në kuadër të Digital Services Act (DSA), duke nisur një hetim të thelluar ndaj platformës së njohur të modës online, përcjell DW.
Komisioni bëri të ditur se hetimi do të përqendrohet në disa çështje kryesore, përfshirë atë që e cilëson si “dizajn varësues” të platformës, mungesën e transparencës në sistemet e rekomandimit, si dhe shitjen e produkteve të paligjshme, përfshirë materiale që mund të përbëjnë abuzim seksual ndaj të miturve.
Sipas Komisionit, do të shqyrtohen sistemet e Shein për të kufizuar shitjen e produkteve të paligjshme në Bashkimin Evropian, përfshirë përmbajtje si kukulla seksuale me pamje fëmijësh. Gjithashtu, hetimi do të analizojë rreziqet që lidhen me elementët e dizajnit që nxisin angazhimin e përdoruesve përmes shpërblimeve apo mekanizmave të ngjashëm, të cilët mund të kenë ndikim negativ në mirëqenien e përdoruesve dhe mbrojtjen e konsumatorit online.
Një tjetër fokus i hetimit është transparenca e sistemeve të rekomandimit që sugjerojnë produkte dhe përmbajtje për përdoruesit. Sipas DSA-së, platformat e mëdha online duhet të zbulojnë parametrat kryesorë që përdorin në algoritmet e rekomandimit dhe të ofrojnë të paktën një alternativë që nuk bazohet në profilizimin e përdoruesve.
Hetimi vjen pas polemikave në Francë, ku në nëntor shpërthyen protesta gjatë hapjes së një dyqani fizik të Shein në Paris. Autoritetet franceze kërkuan ndërhyrjen e BE-së pas raportimeve për shitjen e kukullave seksuale me pamje fëmijësh dhe armëve të paligjshme, përfshirë armë zjarri dhe thika. Një gjykatë në Francë bllokoi përkohësisht përpjekjen për pezullimin e aksesit në faqen e internetit dhe i kërkoi Komisionit Evropian të nisë hetim sipas DSA-së.
Komisioni theksoi se hapja e procedurës nuk përbën konstatim shkeljeje, por nisjen e një hetimi të thelluar, dhe se aktualisht nuk mund të përcaktohet sa do të zgjasë procesi. Nëse konstatohet mospërputhje me rregullat, Shein mund të detyrohet të ndryshojë praktikat ose të përballet me gjoba të konsiderueshme.
Autoriteti irlandez për shërbimet digjitale, Coimisiún na Meán, do të përfshihet gjithashtu në hetim, pasi Irlanda është baza e Shein brenda BE-së. Kompania, e themeluar fillimisht në Kinë dhe me seli aktuale në Singapor, raportoi një xhiro globale prej rreth 38 miliardë dollarësh në vitin 2024, në kuadër të zgjerimit të saj të shpejtë ndërkombëtar.
